Indice di “Batata, yuca y batata dushi” a conoce e aumento di mas grandi (1.8%)
Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Maart 2024.
Cambio di prijs di petroleo, utilidad, gasolin y diesel na Maart 2024
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo.
Na Maart 2024 e prijs promedio pa bari di petroleo (US$ 81.01) a conoce un aumento di US$ 4.08 (5.3%) compara cu Februari 2024 (US$ 76.93). Prijs di electricidad y di awa no a cambia compara cu Februari 2024. Consecuentemente, e prijs promedio di electricidad pa vivienda a keda Afl. 274.57, mientras cu e prijs promedio di awa pa vivienda a keda Afl. 168.73.
Prijs di gasolin a registra un aumento di Afl. 10.20 cent (4.2%) na Maart 2024 y a causa un efecto di 0.19 ppt riba e CPI. Prijs di diesel a registra un aumento di Afl. 8.60 cent (3.8%) na Maart 2024 y a causa un efecto di 0.01 ppt riba e CPI.
Na Maart 2024, utilidad, gasolin y diesel como grupo, tawata tin un aumento di prijs di 1.2% compara cu Februari 2024 y hunto tabatin un influencia di 0.21 ppt riba e CPI, mientras cu e restante 404 bienes y servicio hunto, a conoce un aumento di prijs di 0.6% y tabatin efecto un efecto di 0.53 ppt riba e CPI.
Cambio di prijs di Cuminda y servicio di catering na Maart 2024
E indice di “Cuminda & servicio di catering” a registra un aumento di 0.2% na Maart 2024, despues di a registra un caida di 0.5% na Februari 2024.
E indice di “Cuminda na cas” (0.2%) a registra un aumento, unda ocho (8) di e diesun (11) indicenan di e gruponan di cuminda na cas a subi na Maart 2024.
E indice di “Batata, yuca y batata dushi” a conoce e aumento di mas grandi (1.8%) na Maart 2024.
Otro aumentonan significante a wordo registra den e indicenan di “Bebida no-alcoholico” (0.9%), “Berdura” (0.6%) y “Lechi, keshi y webo” (0.5%).
E caida mas grandi a wordo registra den e indice di “Pisca y otro cuminda di lama” (-1.2%) na Maart 2024. E indice di “Cuminda pafo di cas” a registra un aumento di 0.1% na Maart 2024. Na Maart 2024, “Cuminda na cas” y “Cuminda pafo di cas” como grupo, tabatin un aumento di prijs di 0.2% compara cu Februari 2024 y hunto tabatin un influencia di 0.03 ppt riba e CPI, mientras cu e restante bienes y servicio hunto a experimenta un aumento di prijs di 0.8% y tabatin un efecto di 0.71 ppt riba e CPI.
