Di e noticia treci pa e programa di television Hulandes Nieuwsuur algun dia pasa encuanto e colaboracion di Aruba Airlines den expulsion forzoso di disidentenan Cubano di nan pais, a sali varios reaccion, entre otro di parlamentarionan Hulandes cu ta haci pregunta na e ministronan concerni. Pero tambe a bin dilanti cierto informacion cu ta pone duda den e actuacion di e compania di aviacion Aruba Airlines.

E aspecto aki no ta trata e denuncia cu Aruba Airlines ta o tabata colaborando den transporte di disidentenan Cubano, sino di e status legal di e compania na Aruba. Den e preguntanan haci den Tweede Kamer a referi na e ‘Decreto Ministerial di Aruba DL/121257-A y DL/1131–2012 di september 2012’. Riba internet por haya un copia di e traduccion hura na Spaño di e decreto ey, cu ta resulta di ta no un decreto ministerial, sino un decreto nacional o estatal (Landsbesluit) . Den su articulo 4 e decreto aki ta establece cu e compania mester cumpli cu requisito di ‘substantial ownership’ y ‘effective control’, loke ta significa cu e compania lo mester ta capaz di demostra na cualkier momento cu mas di 70% di e accionnan di e compania ta den man di residente permanente di Aruba, o di un persona huridico constitui conforme legislacion di aplicable na e pais aki. Tambe cu e oficina principal, e control di operacion y domicilio social mester ta na Aruba.

Sin embargo, den e programa d television Nieuwsuur a mustra documento for di cual ta resulta cu un holding ta 100% propietario di Aruba Airlines, y cu e holding lo ta den man di Esteban Valles, di nacionalidad Venezolano y Mericano, residencia na Miami. E documento cu Nieuwsuur a presenta den su programa cu ta verifica e 100% propiedad stranhero lo ta procedente di e compania mes, segun e medio a declara. Nos averiguacion a duna cu Aruba Airlines ta cay bao di un holding na Aruba mes, Seastar Holding NV, nr di KvK H24889. Si e informacion di Nieuwsuur ta corecto, anto Valles lo ta propietario di e holding, di forma cu ta igualmente e ‘ultimate beneficial owner’ aki ta dirigi e compania.

Den e programa e medio Hulandes a conta tambe di nan preguntanan na gobierno di Hulanda y Aruba. Segun Nieuwsuur gobierno di Aruba a declara cu Aruba Airlines ta cumpliendo cu leynan di Aruba pa loke ta propiedad y registracion di e compania na Aruba.

Bon Dia Aruba a trata na varios oportunidad pa tuma contacto telefonico cu e oficina di Aruba Airlines na Aruba, pero no a logra haya comunicacion.