(CNET) – California por ta e lider nacional den infrastructura di vehiculo electrico, pero ta Indiana tin plan pa test un tecnologia impresionante pa careteranan nobo.
The Drive a reporta riba e anuncio di Departamento di Transporte siman pasa cu ta bay test asfalt di recarga wireless pa vehiculo electrico. E tecnologia, concret magnetizable, ta bin di un startup Aleman yama Magment. E idea ta pa yena e bateria di un vehiculo electrico mientras bo ta core riba e caretera, loke lo ta un berdadero innovacion den infrastructura di recarga.
Cu ayudo di Universidad Purdue, e estado tin plan pa test e concret magnetisa den varios fase. No por spera cu e asfalt special ta bay ta riba caminda mesora. Sino cu testnan lo tuma luga na e campus West Lafayette di Purdue a traves di e Programa Conhuto di Investigacion di Transporte di e estado. Esaki lo cubri fase uno y dos di e proyecto pa observa y optimisa e tecnologia.
Fase tres ta mas emocionante. Aki, INDOT lo cuminsa construccion di un caminda di alrededor di mey kilometer pa mas test den mundo real. E no ta bay ta riba caminda publico, pero ingenieronan kier studia con bon e asfalt ta recarga trucknan di uso pisa. Trucknan semi y di uso pisa ta un area clave pa electrificacion.
Unabes cu Indiana termina cu tur e testnan aki, e estado tin plan pa electrifica un porcion di e sistema di caretera interestatal dentro di su fronteranan. INDOT no a duna un cronograma final pa ki tempo esaki lo por sucede, y probablemente tin hopi di haci cu con bon e testnan bay, pero trabao pa e prome dos fase ta cuminsa e berano aki.
