India a prohibi 43 app mobil ayera, incluyendo hopi di China, cu ken e ta cera den un conflicto militar riba nan frontera na Himalaya.
Ministerio di Tecnologia di Informacion Indio a bisa cu e appnan ta menasa e ‘soberania y integridad di India’.
E appnan prohibi ta inclui esnan di e gigante minorista Chines, Alibaba Group.
E movida ayera ta bin algun luna despues cu India a prohibi cantidad di appnan Chines, incluyendo TikTok y e wega PUBG, bisando cu a ricibi reportenan cu nan tabata ‘horta y transmiti data di usuario clandestinamente’.
China y India ta mara den un disputa fuerte tocante frontera pa varios luna, den e region remoto di Ladakh. E enfrentamento entre e gigantenan Asiatico na mei a converti den un lucha feroz, y despues a empeora dia 15 di juni cu soldadnan usando baton, piedra y mokete den combate, lagando 20 tropa Indio morto. Ta kere cu China tambe a sufri casualidadnan, pero no a duna ningun detaye.
Ambos banda a tene varios ronda di negociacion entre oficialnan militar y diplomatico, pero e tension ta persisti.
Lidernan di partido den gobierno a elogia e prohibicion di e appnan na India como un forma pa mitiga e influencia cresciente di China.
Appnan propiedad Chines a haya un mercado creciendo rapidamente na India, cu algun compania creando appnan specifico pa India cu a explota den popularidad.
