INDIA (themindunleashed) – Mientras mundo cada bes mas ta mira pa automatisacion, ciencia ficcion rapidamente ta birando realidad, mientras solucionnan automatisa ta aparece tanto riba campo di bataya como den bida civil.

Den e estado suroeste di Kerala na India, un tipo di oficial di polis nobo a ser huramenta – un polis robot yama KP-Bot.

Mientras e robot humanoide ta parce mas algo cu lo wordo haya na Disneyland en bes di e RoboCop cu a patruya e cayanan di Old Detroit den e pelicula clasico di 1987, e KP-Bot ya a alcansa e rango di Sub Inspetor, y segun India Today, ya sa con pa haci un ‘saludo perfecto’.

KP-Bot ta parti di un iniciativa pa integra robot den cuerpo policial, locual a wordo anuncia aña pasa pa e hefe di polis estatal na e Cocoon Cyber Conference.

Sinembargo, e KP-Bot not ta cla pa bringa riba caya; e robot femenino lo ta restringi na e rol tradicionalmente asocia cu su genero, esta recepcionista – cumindando e bishitantenan den e lobby, manehando citanan cu oficialnan, dunando carchi di identificacion y archivando kehonan, y dirigiendo bishitantenan na varios sitio den e stacion di polis.

En realidad, ya caba e ayudante di polis adhunto, Manoj Abraham, a referi na KP-Bot como un bona fide ‘muhe’, mientras director general di polis, Lognath Behra, a declara: “Empoderamento femenino y igualdad di genero tabata den nos mente ora di dicidi e genero di e prome robot. Ademas, e hecho cu mayoria di trabou di front office ta haci pa muhe tambe a wordo considera.”

Tecnologistanan den e estado tambe ta spera di ekipa e KP-Bot cu caracteristicanan mas apropia pa un oficial androide tipico, manera reconocemento di cara y habilidad di detecta explosivo.

Polis di Kerala ta leu di ta e prome organisacion den introduci robot den nan caha di herment.

E startup Knightscope a hala atencion publico despues cu su propio polis robot, e Knightscope K5 – yama den material promocional ‘un cambio den wega pa operacionnan di siguridad tur caminda’ – tabatin un cantidad di incidente publico di ‘mala conducta’.

Na 2016, e robot automatisa di siguridad priva, cu ta midi 5 pia di largura cu un peso di 300lbs – y ta comporta similar na un Roomba – a trapa riba un baby di 16 luna den un incidente di hit-and-run na Palo Alto, California. Na april 2017, e robot polis tabata involucra den un bringamento na Mountain View, unda un homber di 41 aña bou influencia di alcohol a dicidi di ataca e droid.

Algun luna despues, Knightscope K5 a caba su record di berguensa cu un caida humiyante den un fontein publico na Georgetown, Washington, cual rednan social a specula tabata un caso di ‘suicidio’ relaciona cu stress laboral, of hasta un ‘bautiso’ di parti di e compania.

Mirando e carera tristo di Knightscope K5, lo ta un bon idea pa restringi e KP-Bot na un desk mientras e ta un rookie.