(EFE) – Un avalancha di hende den cual 121 di nan a muri a produci den un evento religioso na nort di India ora varios di 250,000 presente a purba acerca un guru local yama ‘Bhole Baba’, loke a provoca cu hopi di nan a cay y no por a sali di e luga segun fuentenan oficial a informa.

E multitud a bira e tripel di loke organisadonan tabata spera na districto di Hathras, ubica na estado di Uttar Pradesh, segun e corant Indian Express a indica cu base na e denuncia presenta pa e organisacion.

“Mi a papia cu varios testigo y nan a informa mi cu e incidente a sucede ora e evento a caba. Ora e guru tabata bahando for di stage, varios muhe a cuminsa bay cerca dje pa tokele, pero e seguridad a stop nan y e accidente a cuminsa,” hefe di Gobierno di Uttar Pradesh, Yogi Adityanath a bisa.

Segun e medio local, e denuncia ta nombra varios di e organisadonan, pero no ta menciona directamente e guru Bhole Baba, unda miles di hende a acerca te e luga pa wake den persona.

E ceremonia religioso, un especie di acto di oracion organisa pa Bhole Baba, a tuma luga na un espacio amplio den cual na zona central tabatin algun structuranan y telanan pa ricibi e cantidad grandi di publico.

Ora e evento a culmina, un avalancha di hende a caba cu e bida di por lo menos 116 persona, segun secretario hefe di Gobierno di estado di Uttar Pradesh, Manoj Kumar a bisa y a confirma cu 100 di e fayecido ta hende muhe.

E causanan exacto di e suceso te ainda no ta conoci pa Polis, aunke magistrado di districto di Hathras, Ashish Kumar, a bisa na prensa cu e incidente a produci pa e gran cantidad di hende cu a yega y a purba di bandona e luga na mesun tempo.

Ademas, testigonan presencial interoga pa medionan a bisa cu varios persona a cay den un tereno instabil loke a provoca un caida den cadena y hopi di nan a muri sin cu por a hala rosea.

Avalancha di hende ta fenomenonan frecuente den celebracionnan religioso Indio y ta debi den gran parti, na deficiencianan den e gestion di concentracionnan multitudinario of na e escasez di infrastructura cu ta rondia e luganan di e culto.

Sinembargo, por a recorda un suceso similar cu a tuma luga na september di 2008, ora por lo menos 150 persona a muri y otro centenar y mei a resulta herido den un avalancha humano na un tempel di e ciudad di Jodhpur na Rajastan.