E perspectiva di accion di empleado publico a aparece na horizonte atrobe. E negociacion, talvez miho yama esaki ‘conversacion’ cu gobierno no a duna ningun resultado, asina nos por destila di e carta cu e sindicatonan a manda pa gobierno e siman aki.

Nan no ta satisfecho cu esey y ta exigi compensacion den salario pa e inflacion, specificamente di aña 2018, unda en berdad tabatin un aumento fuerte di inflacion, causa pa e medidanan fiscal cu gobierno a tuma den e aña ey. E añanan anterior tabatin aña cu casi no tabatin inflacion, mientras den otro caso hasta por a papia di ‘deflacion’ unda cu e poder di compra di nos florin a aumenta levemente. No cu esaki ta lago cu nos mester interpreta como algo positivo, pasobra e reduccion di nivel di prijs tabatin di haci tambe cu e situacion bastante debil di e poder di compra general, mientras economia tabata tambalea, intercambiando aña relativamente bon cu otro malo.

En todo caso, e inflacion fuerte automaticamente ta trece e sindicatonan den accion y lo ta straño si nan no hacie; ta p’esey nan ta sindicato y ta representa interes di e trahadornan afilia cu nan. Di e punto di bista aki ta logico cu nan ta reacciona negativamente ora gobierno bisa cu “no tin espacio” pa indexering, pasobra esey ta en berdad e defensa ‘standard’ di tur gobierno.

Lamentablemente, den e caso actual gobierno ta papia berdad ora nan bisa cu no tin espacio, pasobra nan ta mara na e protocol firma na november pasa cu Hulanda, y na e momento aki tin un problema grandi caba pa cumpli cu e limite di gasto di personal stipula pa e aña aki, cu ta Afl. 479 miyon. Si di tur manera kier haci un gesto den direccion di e sindicatonan, lo mester crea extra espacio, pero con? Cualkier entrada extra cu gobierno logra haya, cu ta planea o ta cay di cielo pa suerte, mester ta destina na reduci e debe gigantesco cu nos tin. Y fia placa pa paga indexering lo ta absolutamente imposible, pasobra aki tambe nos ta topa cu e restriccion cu e supervision di Reino ta pone. Pasobra, contrario na loke e parlamentarionan cu ta sostene e coalicion ta kere, e supervision di Reino no a muri ‘den accion’ dia cu un mayoria den parlamento a dicidi cu nan ta ‘delete’ e supervision Hulandes for di e ley concerni.

Tur esaki ta haci cu no ta asina dificil pa gobierno mustra cu nan man ta mara. Pero tambe ta mas cu cla cu e sindicatonan no ta bay acepta esaki, pa mas cu gobierno bisa cu ‘no por’. Den e situacion aki, si no por di e manera di aumenta gasto, anto kico ta e posibilidad pa reduci gasto pa haya espacio pa duna indexering? Unda gobierno por economisa pa crea espacio? Basicamente tin dos categoria di costo riba presupuesto cu ta candidato pa austerisacion. Un di nan ta ‘Bienes & Servicio’ cu a keda reduci bastante caba den ultimo añanan, y ta bira dificil pa reduci mas. E otro categoria ta e gastonan di personal mes, cu en total ta suma e aña aki Afl. 735 miyon florin, mas di mita di e presupuesto… Esaki tumando na cuenta, fuera di e Afl. 479 miyon florin di gobierno ‘limita’, tambe e gastonan di Staten, Raad van Advies, Algemene Rekenkamer y DOW, tal manera CAft tambe a trece dilanti recientemente y cu Raad van Advies pa varios aña ta señala caba den nan conseho riba presupuesto di gobierno.

Conclusion lo mester ta anto, cu e ‘post’ mas grandi ta esun cu ta e candidato mas grandi pa austerisa y crea espacio? Si, esey ta posible y necesario. Gobierno lo mester baha gasto di personal, pa por haci otro gasto di personal… Esey riba su mes no ta nada straño tampoco, pasobra cada empresa tambe sa topa cu e necesidad di e tipo di medida aki,unda mester laga personal innecesario bay pa por tuma na trabao esnan cu realmente tin mester pa por progresa, produci mas cu menos hende… Esaki ta zona masha duro pa persona cu ta candidato pa bira victima di e situacion, pero realmente no tin otro opcion. Y mas ainda pasobra na e momento aki ta imposible pa gobierno bay aumenta e peso riba pueblo, a traves por ehemplo di aumento di impuesto indirecto pa por paga esaki.

E problema adicional ta naturalmente cu no tin un plan di reduccion di gasto por medio di restructuracion di e departamentonan pa mehora operacion y de paso reduci personal unda cu por, algo cu ademas semper ta un plan cu ta tuma varios aña pa ehecuta, hasta por dura varios periodo di gobernacion pa logra haci esaki na un manera integra. E unico instrumento cu gobierno tin ta e salida voluntario di empleado publico (VUT) cu nunca a duna tanto resultado pa realmente duna gobierno un poco ‘rosea’ pa por maneha su recurso humano cu mas trankilidad.

Kico lo ta e resultado final di e midimento di forsa cu ta na caminda? Nos no sa; loke si nos sa cu cualkier bataya cu presenta, ta dificil pa bisa cu lo tin ganador. Pueblo lo ta perdedor sigur, di tur manera.