Den nos edicion di ayera tabatin un relato extenso di e informe encuanto e administracion di Recurso Humano di Dienst Publieke Scholen, cu a keda cla na 2021 caba, pero cu a bira conoci publicamente den e dianan aki.
Inmediatamente a surgi un discusion tocante ken tabata responsable pa laga investiga e asunto y cobra merito politico pa esaki. Segun e anterior ministro di enseñanza, su persona a ordena e investigacion haci pa Departamento di Recurso Humano. Esaki lo a tuma lugar entre februari y april 2021 y, segun e anterior mandatario, na mei 2021 conseho di ministro lo a aproba e recomendacionnan cu el a propone. Por lo tanto e no ta comprende con ta trece e asunto aki awor como merito di e actual ministro encarga cu enseñanza. Si e hechonan aki ta corecto, anto nos por comprende su disgusto. Di otro banda, si un ministro actual ta duna bon continuacion na trabao haci anteriormente, independiente di ken tabata e anterior mandatario, esey lo ta un bon señal, sigur den nos cultura negativo gubernamental di no continua proyecto di e anterior gobierno.
Pero e editorial aki no ta dedica na e disputa ey, di ken ta esun cu berdaderamente merece elogio pa e trabao haci. Esey ta algo cu no mester dicidi ademas solamente a base di e intencion di actua a base di e rapport, sino mas bien a base di loke a o ta tuma lugar actualmente pa mehora e problema detecta. Y ta netamente ey nos no ta tende nada… Ademas, nos mester ta sorprendi cu e situacion administrativo ey na e entidad publico aki? O nos mester puntra nos mes: con general tal situacion por ta – ainda – na varios otro oficina di gobierno? Realmente nos mester kere cu esaki ta un excepcion grandi den henter e aparato?
Y e publicidad alrededor di e asunto aki ta pone atencion tambe riba otro aspecto importante. E anterior mandatario a trece dilanti cu, mirando e problemanan den maneho di e departamento, el a bin cu e proposicion di independiza e departamento, creando un fundacion cu lo a opera independiente di gobierno. Cu esaki e ex-mandatario lo kier a preveni o cura un cantidad di mal practica den e servicio gubernamental, cu segun su opinion lo ta mas factible combati den e forma organizativo ey.
Nos no por comparti e pensamento ey. No cu nos ta rechaza – por principio – e idea di incorpora cierto tarea gubernamental den otro entidad, pero tur cos ta depende di con ta ehecuta e independizacion aki. Y si nos tira un vista riba e casonan di independizacion di pasado, anto no tin mucho di gaba ey. Por ehemplo, un Serlimar cu a hiba e mal practica administrativo bieu den e entidad nobo, a keda añanan largo ta opera sin sikiera laga traha cuenta anual, mientras gobiernonan di diferente color politico cada vez tabata trece nan ‘hendenan di confianza’ pa sinta den e hunta di supervision, aparentemente no pa drecha e organizacion, sino pa sirbi como watchdog pa e gobierno di turno. Ta te recientemente a bin coregi e desastre administrativo aki, mientras cu ainda e problemanan no a termina; tur aña un parlamento bon suf ta vota obedientemente pa hinca mas placa di belasting den e ruina ey, sin cu ta exigi e medidanan pa realmente e compania por tin suficiente ingreso di su mes. Y pakico no? Pasobra tur politico sa cu si mester regla e cos aki na un manera drechi, anto ta percura pa cada hogar y negoshi paga pa e servicio… Pero no, ta prefera di keda subsidia, pasobra asina nan ta sinti nan mes poderoso, cu un Serlimar cu mester bin na rudiya pidi placa pa cera aña, tur aña. Anto sin haya e cuenta anual anterior pa mira!
Ademas e asunto aki tin otro banda cu ta mas intrigante ainda. Si no por spera cu ‘por arte de magia’ cos ta drecha ora un entidad pasa pa ta independiente, esey ta laga un pregunta clave sin contesta: pakico no por drecha administracion mientras e departamento ta keda directamente bao di gobierno? Acaso nos ta asina custumbra caba cu nada no por drecha siendo entidad gubernamental, cu ta surgi e idea cu ‘mester independiza pa mehora’? Lo no ta mas logico pa yega na e conclusion cu e tipo di maneho menos cu mediocre aki no por tuma lugar na ningun entidad, sea gubernamental o semi-guberamental, no na aña 2022 ainda. Y di e manera aki e asunto aki no ta solamente responsabilidad di e ministro encarga cu enseñanza. Lo ta bon si nos ministro encarga cu asunto general por duna claridad encuanto e calidad general di administracion di recurso humano, mientras ta importante tambe yega na claridad encuanto e maneho financiero na e departamentonan. Nos sa cu tin trabao den ehecucion pa mehora maneho gubernamental financiero, loke por encera tambe un mehoracion di e procesonan den e departamentonan mes.
En todo caso, e conclusion no por ta otro sino cu nos mester mehora gobernacion, unda cu ta. Independiza un servicio gubernamental mester ta a base di argumento cu ta make sense pa e entidad specifico ey; mal administracion no ta esey. Di otro banda, crea entidad ‘independiente’ den nos sistema mas tanto ta resulta un farsa, pasobra influencia politico t’ey semper, ademas brindando oportunidad pa ubica persona ‘di confianza’ den puesto lucrativo. Nos no ta mira cambio.
