For di diadomingo ultimo, usuarionan di rednan social tabata bin expresando nan mal contento pa loke ta trata e servicio di e compania telefonico nacional SETAR den e cual tabatin inconvenientenan pa realisa yamada y tambe cu servicio di internet.
Pa esaki, diadomingo ultimo riba nan Facebook page SETAR N.V a informa cu nan tabata enfrentando problema cu nan Mobile Network y nan tecniconan tabata trahando pa soluciona e problema lo mas pronto posibel.
Ayera dialuna mediante un otro update riba e red social, nan a bisa cu debi na problema cu mobile network, esey tabata influencia tanto Voice como Data.
“Di ayera atardi nos tin tur supplier y nan expertonan internacional envolvi pa resolbe e problema, e ta un fayo compleho cu ta tuma su tempo pa resolbe.” Nan a bisa.
Siguientemente, nan a señala cu “red di LTE a cuminsa stabilisa, internet a cuminsa traha riba celular, e conexion di voice ta encontrando problema.”
Den oranan di atardi, nan a sigura cu “red LTE a stabilisa pa clientenan cu tin paketenan postpaid pa ambos voice y data, prepaid no tabata completamente resolvi ainda.”
Pa esaki, SETAR N.V a restringi e cantidad di personanan pa por haci nan comentarionan riba e red social, sinembargo, e servicio a cuminsa stabilisa den oranan di atardi pero e mal contento tabata persisti na unda por a mira cu e servicio tabata hopi slow, algo cu sigur a afecta basta hende cu ta haci uso di telefon y internet pa por cumpli cu nan trabou.
Bon Dia Aruba a tuma contacto cu minister encarga cu Telecomunicacion Geoffrey Wever ken a sigura cu “Setar ta trahando around the clock pa soluciona e problema aki.” sin duna mas detaye.
