E falta di acceso na alimentonan saludabel por dificulta e perdida di peso, incluso si ta siguiendo un dieta intenso y un programa di ehercicio, segun un estudio publica dia 8 di maart den Annals of Internal Medicine.
E investigadonan di Centro di Investigacion Biomedico di Pennington a analisa datonan di 803 pashent cu obesidad na Luisiana cu a somete na un prueba di perdida di peso di dos aña.
Poco mas di mita di nan tabata asigna na un programa intensivo di dieta y ehercicio, cu sesionnan regular di asesoramento, plannan di alimentacion y consehonan pa inclui un actividad fisico mas regular. E resto a ricibi conseho medico general y chekeo regular na man di su mediconan.
“E ta un problema di disparidad den e salud” segun a bisa pa Insider Dra. Candice Myers, autor principal di e estudio y profesor assistent na Pennington. “Si ta pensa riba e perdida di peso como un cuestion di equidad di salud, ta posibel cu e posibilidad di alcansa un peso saludabel no ta algo na loke tur hende tin acceso.”
Poco investigacion riba con e acceso na alimentonan ta afecta e perdida di peso
Ta conoci caba cu e insiguridad alimentario, defini como e falta di acceso constante na alimentonan saludabel, ta relaciona cu un mayor peso corporal y un mayor riesgo di obesidad.
Tambe tabata tin demasiado poco estudio cu ta examina directamente con e insiguridad alimentario por afecta e perdida di peso.
“No tin hopi eynan, specialmente no den e contexto di un ensayo clinico aleatorio,” Myers a bisa.
Un dieta di menor calidad y e riesgo di pasa hamber por dificulta e adopcion di habitonan alimenticio saludabel.
Ainda nos no tin pruebanan cu ta splica pakico e insiguridad alimentario por dificulta e perdida di peso di algun persona, aunke ta existi hopi teoria, incluyendo factornan social, psicologico y fisiologico.
Un ta cu e presupuesto di alimento mas ahusta ta conduci na un dieta di menor calidad; e alimentonan procesa por ta mas barata y conveniente cu hopi opcionnan mas saludabel (manera productonan fresco, carni magro etc), pero nan ta relaciona cu riesgo pa salud, incluyendo obesidad.
“Si nos ta pensa den e insiguridad alimentario, tin un impacto directo den loke e hende ta come y con e ta hacie. E ta un cuestion di cantidad y calidad di e alimentonan”, Myers ta bisa.
E factornan psicologico y fisiologico tambe por detene e perdida di peso di e persona cu insiguridad alimentario.
E personanan di nivel socioeconomico mas abou tambe ta core riesgo di sufri factornan psicologico manera stress, depresion y ansiedad, tur locual por obstaculisa e perdida di peso. Incluso tin algun evidencia cu, fisiologicamente, hende cu no tin acceso constante na alimentonan por conserva e peso como mecanismo di supervivencia, Myers a bisa.
E la añadi cu e ta probabel cu e lo ta un combinacion di factornan, loke den e ultimo instancia, dificulta cu e personanan cu insiguridad alimentario perde peso. E proximo pasonan pa e investigacion lo ta descubri con e ta funciona y potencialmente ofrece programanan di perdida di peso pa yuda mehora e personanan necesidad.
