Status di incinerator chikito no a inicia ainda. E ta practicamente stagna. Y aunke e ta cla, pero debi na e situacion actual di lockdown y shelter in place, e tecniconan cu mester a bin pa completa y caba cu e trabao aki no por a yega Aruba. Esaki a ocasiona cu tin un atraso, asina minister Marisol Lopez-Tromp a informa parlamento durante tratamento di presupuesto di DOW.
Pa evita e congestionamento di desecho y kimamento den dump, el a bisa cu Serlimar y Ecogas ta trahando duro riba e mitigacion di e molester di huma. E ta haya cu esaki ta importante pa wordo percibi y sinti pa e habitantenan di e bisindario cerca di e dump.
Actualmente tambe nan tin un caso sumario caminda hues a indica cu mester atende cu e problematica di huma den dump. Aunke e ta haya cu gobierno no por remedia e situacion full den tres luna un problema cu ta andando for di 60 aña pasa. Pero si nan ta haciendo e maximo esfuerso pa atende cu e problema di maneho di sushi mas miho y completo posibel na bienestar di salud publico.
Actualmente nan a bin cu un metodo otro pa kima desecho di plastic segun maneho di salubridad publico, y e ta considera esaki como un mehoracion. Esaki compara cu e forma cu nan tabata haci prome.
E siguiente paso lo ta incinerator ora cu e ta cla pa su operacion pa medio di temperatura halto y controlabel. E ta spera cu e procedura por ta cla lo mas lihe posibel denter di e normanan pa salud y medio ambiente y asina informa parlamento di dje.
