Incinerator na Parkietenbos lo keda activo tanten proyecto di RWZI nobo haya un biodigester

Diahuebs ultimo 22 di december minister di Transporte, Integridad, Naturalesa y Asuntonan di Adulto Mayor Ursell Arends a haci un conferencia di prensa pa haci e anuncio di ceramento di dump Parkietenbos unda tambe a aclaria cierto informacion cu redactor di Bon Dia Aruba a trece dilanti den e seccion di pregunta.

Minister ta menciona ciere di Parkietenbos. Pero e ciere aki ta uno parcial mirando cu ainda lo sigui kima e slib di RWZI den e incinerator na Parkietenbos. Mirando cu e incinerator ta operando y e permiso a wordo duna contra e ley di LRO/ROPV, tin plannan pa reloca esaki na unda cu si e ley ta permiti?

Pa cu esaki, minister Arends a contesta cu incinerator tin un tarea cu e por haci pa kima e sludge, den e proyecto cu ta finalisando pa e RWZI nobo cu ta bay bin na Bubali Plas idealmente lo bin un biodigester cu ta bay procesa e slib na e sitio eynan mes, “dus incinerator tin un funcion pa haci temporalmente tanten no tin un RWZI nobo y tambe incinerator ta bay tin un tarea pa procesa otro tipo di desperdicionan, cu actualmente no tin un otro solucion pa nan, pero pa loke ta trata desperdicio subi riba dump di Parkietenbos, dia 31 di december esaki ta bay ta e ultimo dia cu ta habri pa publico y ora aña habri conhuntamente cu e trahadonan di Serlimar cu ta na Parkietenbos, na e momentonan aki, nos lo cuminsa prepara e area pa remedia esey pa asina aki dun’e otro destinacion,” el a anuncia.

Tambe a sigura cu esaki ta bay ta un proceso y na su debido momento nan lo comunica esey na comunidad pa remedia e area den cual tin planea pa bira un solar panel farm caminda segun e indicacion cu nan tin, por ubica mas cu 16.000 solar panel y esey lo produci coriente pa Aruba tambe.

Igualmente el a informa cu no ta bay bin cu mas incinerator pa Aruba, debi cu e vision di su ministerio di Naturalesa “no tin ningun vision pa trece mas incinerator.”

Segun ICAO (International Civil Aviation Organisation Division di Nacionnan Uni) no mag tin afvalverwerking/dump asina cerca di aeropuerto. A tuma nota cu e slib ta wordo laga riba tipping floor unda parhanan ta bin come y por causa peliger pa avionnan eybanda. Minister ta pensa e ta responsabel pa sigui laga e slib wordo hiba na Parkietenbos?

El a contesta cu el a tuma nota di esaki unda un politico a trece e informacion aki dilanti y segun su opinion, minister ta señala cu ta bon pa ilustra cu su persona no ta solamente minister di Naturalesa encarga di Parkietenbos, tambe e ta encarga cu e cartera di Transporte unda aviacion ta restaura bao si ministerio, “a mi no ta haci algo cu ta contradictorio pa mi propio ministerio, esaki no ta e caso, tur aspecto ta wordo atendi cu nan y cu departamento di aviacion ta haci tur tarea pa informa nos y pa ta sigur tambe cu ta cumpli cu tur rekisitonan cu ICAO ta prescribi pa Aruba, nos ta zorg pa companianan cu ta procesa desperdicio tambe ta atene nan mes na standard mas halto necesario.”

Segun landsverordening instelling Serlimar cu ta un compania Sui Generis ta e unico instancia legalmente autorisa pa maneha desperdicio y cu esaki mester sosode na un manera duradero. Awor e maneho ta bay pa companianan priva. Con minister ta bay zorg pa regla esaki legalmente y si ta permiti sin tin e leynan in place?

Minister Arends den su contesta a señala cu nan ta bay regla esaki den un Ministeriele Beschikking unda lo cuminsa prepara esaki cu companianan di desperdicio, “mi mester bisa si cu Serlimar ta bayendo den bon direccion e cual ta recuperando di e debe cu nan tin, nan ta recuperando di e surseance van betaling cu nan tin ainda, y e aña aki nos a paga 2.5 miyon florin di e debe cu tabatin cu e comercial creditoren unda pa 2023 Parlamento di Aruba y gobernador a firma e begroting caba, nos ta bolbe paga 2.5 miyon florin y ta keda 2 miyon so pa paga den 2024 y un bes esaki ta formalisa, Serlimar tambe por bay bek den proceso desperdicio of bay procesa desperdicio di un forma duradero,” el a bisa.

Sinembargo, un Ministeriele Beschikking (MB) no ta riba ley di Serlimar ya cu ta un decision firma door di un minister, su rango ta mas abou cu un ley formal cu ta bay via parlamento.

E parti aki ta keda na gerencia y raad van bestuur pa identifica cua ta e tipo di desperdicio cu nan kier procesa y pa nan tambe por ta competitivo den e mercado aki “esey ta loke nos ta premira pa Serlimar, na momentonan aki situacion financiero no ta permiti pa Serlimar mes por asumi e responsabilidad aki y nos ta pasa di stort desperdicio den Parkietenbos pa companianan cu ta bay procesa esaki den grondstof cu nos por usa localmente of grondstof cu nos por exporta, esey ta netamente cu e blueprint cu nos a traha cu tur e companianan aki,” el a sigura.

Tambe a declara cu tin companianan cu pa 1 di januari ta activo y tin otro cu ta haciendo investigacionnan cu durante e aña nan lo bira activo pa ricibi cierto desperdicionan.

Pa loke ta trata creacion di leynan ambiental, el a informa cu nan ta bezig cu esey hunto cu huristanan di e bureau cu ta trahando den tres legislacion cu ta netamente pa naturalesa unda tin expertonan di medio ambiente envolvi den esaki tambe, segun el a afirma na Bon Dia Aruba.

Tin cierto habitantenan di area di Parkietenbos cu ta indica cu nan no a wordo informa di tur esaki y a warda te ultimo momento pa trece e informacion dilanti, pa esaki, minister Arends a comenta cu su persona y su ekipo a duna un presentacion den e bario “pero lamentablemente no ta tur habitante a presenta, pero a mi semper ta disponibel pa comunica y brinda informacion na tur hende cu kier,” el a bisa.

Tambe a señala cu na aña 2023 nan lo bay haci un health impact assessment cu un instituto di Hulanda y cu nan lo involucra ful e bario “pasobra nos kier wak kico tabata e impacto cu tabatin den e vecindario,” el a finalisa.