Ayera DOW a informa cu incinerator na Parkietenbos a daña for di dia 8 di september na unda nan a haci un evaluacion dia 12 di september pa wak kico ta e defecto unda a constata cu e primary chamber tabata den hopi mal estado.

Asina a informa director di Dienst Openbare Werken Aruba (DOW) Marlon Croes durante un conferencia di prensa indicando cu for di e dia ey nan a cuminsa traha pa wak kico ta e miho manera pa nan por pone e incinerator draai back lo mas pronto posibel pa motibo cu cada dia cu nan ta keda sin opera nan ta haya acumulacion di medical waste y slip cu e riool di water zuivering instalatie ta produci.

Aworaki nan tin dos opcion riba mesa na unda un di nan ta pa cumpra e primary chamber nobo cu tin un prijs basta halto manera Cores a sigura, cu den tres of cuatro siman e incinerator lo por draai back of nan lo drecha e incinerator cu betonwerk y lo por tarda cinco siman mas, por lo tanto e riesgo ta mas grandi.

Den e situacion aki, nan ta conseha Gobierno di Aruba pa cumpra un primary chamber nobo pa lo cual e besteling ya caba a tuma luga e siman aki y ta riba ship pa por yega Aruba y instala esaki y pone e incinerator draai back den tres of cuatro siman.

“Nos por trece e incinerator back den operacion pero e ta un incinerator cu su so ta draai y nos no tin redundancia di un sistema, nos ta den un proceso pa haci ehercicio cu aworaki tambe pa nos por crea redundancia y rehabilitacion den su operacion pa adkiri un of dos incinerator mas pa nos por garantisa un operacion continuo.”

Di mesun manera a expresa cu nan a cuminsa haci un investigacion pa nan por valida si e incinerator tabata presentando problemanan for di algun tempo y nada a ser haci, Croes a bisa cu hefe di operacion di departamento aki ta esun cu ta responsabel.

“E mashin aki a bay den un operacion masha hopi intensivo, desde cu nos a cumpr’e ta un mashin cu riba su mes ta sofistica cu por maneha e emision cu por tin, pero e problema cu e mashin tin ta redundancia y esey nos tabata draai cune te fin di aña na un manera responsabel, na momento cu dump a cera den palabracion den luna di december cu Ministerio di Naturalesa nos a bisa cu nos ta bay absorba banda di e slip cu nos ta kima cune, nos ta absorba e medical waste y tambe e cadavernan cu tin y esey nos a absorba basa riba e calculacion,” Croes a menciona.

Ademas, el a trece dilanti cu e informacion di cu nan ta ricibi 200 ton di desperdicio pa aña e no ta cuadra cu realidad debi cu den tres luna nan a yega di surpasa e 200 ton y consecuentemente nan mester a draai e operacion aki y cambi’e pa por kima e demanda loke a causa e deterioro di e mashin.

Pa loke ta trata e garantia di incinerator, Croes a comenta cu e compania cu a fabrica e incinerator y ta draai e operacion mes ta duna garantia riba cierto condicionnan y nan ta bay wak si e mantencion regular a tuma luga pero awor nan ta bay investiga si a kibra e reglanan di garantia door cu nan a pusha e mashin te na su limitenan.

Si ta papia di un cumpra un incinerator nobo, esey ta implica un gasto di 600 mil florin y si ta drecha esaki por tin un gasto di 300 mil florin, manera Croes a informa.

Cada siman tin mas desperdicio debi cu incinerator no ta trahando mas loke ta causa mas riesgo y pa e motibo aki nan ta opta pa warda e desperdicio di un manera responsabel manera instancianan como DVG y DNM ta bay indica pa haci’e y asina disminui e riesgonan cu tin. Temporalmente nan ta poniendo e desperdicionan den baki cera pa no keda exponi hasta e proximo tres of cuatro siman cu e mashin lo ta operativo back.

Na momento cu lo trece e nobo, tin cu instal’e y star up e operacionnan hopi lihe pa disminui e riesgo y e mashin bieu nan ta bay drech’e of tin’e como un backup si den caso lo tin mester di dje.

Croes tambe a indica cu nan ta haciendo calculacion y scenarionan si nan tin cu busca mas incinerator pa por draai e mashinnan aki continuamente debi na e cantidad di desperdicio cu ta ser kima cu ta 12 ton di desperdicio pa dia den operacion normal y door cu nan a haya complicacion nan a baha esaki na 8 ton pa dia, segun Kirby Barrera ken ta fungi como e beleidsmedewerker di DOW a sigura.

“Tin dia nos a bay riba 10 ora of 14 ora kimando tur e demanda cu nos ta ricibi tur dia, prome cu juli nos a haya algun complicacion cu e primary chamber y nos a drecha esaki, nos a bisa nos ta baha e presion pa mitiga cu e por sigui opera pa por kima e sushi pero ya na september si el line di paden a cay y esey ta tur e reparacion di mas grandi,” Barrera a comenta.

Pa e cantidad di waste medico nan ta premira cu ta 200 ton pa aña y nan ta hayando 600 ton, segun nan calculo, slip ta igual y carcas tambe e cantidad ta 50% mas halto di loke a premira, tur otro tipo di desperdicio cu otro companianan no por procesa, nan ta ricibi manera productonan cu a caduca.