ORANJESTAD – Ayera durante un conferencia di gobierno, den cual tabata presente minister di Desaroyo Teritorial, Infrastructura y Medio Ambiente Otmar Oduber, el a splica e ‘BID Walk’ cu a cuminsa e siman pasa, pa e maneho di desperdicio na Aruba. El a informa cu gobierno a dicidi di cuminsa un proceso basta largo pa e tema aki y den futuro.

E proceso pa un destaho publico pa loke ta trata e incinerator a inicia algun luna pasa, segun Oduber a expresa. Esey lo transforma e maneho di sushi pa por logra finalmente laga saca energia for di esaki. Ademas di esey, tambe a bisa cu na luna di juli lo conoce e ofertanan cu wordo entrega, y dos luna despues lo bay conoce e contract pa e compania cu a trece e miho oferta.

Oduber a duna di conoce cu 27 compania a participa den esaki. Siman pasa a sigui e fase dos y fase tres, despues cu tabatin e proceso di solicitud di informacion na cuminsamento di aña. El a bisa cu na e momento aki, e destaho publico a cuminsa den e fase dos, cu ta parti di remediacion y eliminacion di Parkietienbos; y e fase number tres, cu ta e fase di ‘Sanitary Landfill’, pa por tin un dump nobo di un manera responsabel, cu normanan pa cuida e medio ambiente, pa atende cu e resto di ‘Bottom Ash y Fly Ash’ cu ta wordo genera door di incinerator den futuro, y naturalmente con otro material cu ta peligroso of cu no por wordo kima den incinerator.

El a informa cu siman pasa, dia 4 y 5 di april a tuma luga e ‘BID Walk’ cu un total di nuebe compania cu a wordo inscribi, tanto local como internacional. Di mesun manera Oduber a splica cu pa fin di aña aki, lo conoce cua compania a gana cada un di e destaho publico y cu probablemente lo cera un contract cu pais Aruba. Esaki lo bay via Parlamento, pa motibo cu ta un proyecto basta grandi, ya cu ta un cambio pa e forma di e maneho di sushi.

Oduber a confirma cu esey lo nifica cu no lo bay existi mas un dump den futuro, na caminda di haya un Landfill nobo na Barcadera di un forma organisa y mas controla.

Di parti di e destaho publico cu ta tumando luga, Oduber a expresa cu gobierno a tuma un decision siman pasa pa por yega na un incinerator. Hunto cu Serlimar y DOW a firma un ‘letter of intent’ pa traha hunto, caminda fondonan cu FDA tabatin a ser uza pa atende di un forma mas responsabel e desperdicio. Pa loke ta trata sushi humano, segun Oduber a expresa, esaki ta wordo kima den un container habri cu tur e consecuencia cu esey ta trece den ambiente.

Di otro banda, el a comenta cu nan sa cu (carcas) bestianan morto ta wordo recogi riba caminda of laboratorio, y otro instancianan tin bestianan morto cu tambe a wordo kima di un manera igual riba Parkietenbos ,y esey no ta e forma mas responsabel pa atende e animalnan morto. Asina tambe como partinan humano y di operacion di hospital of clinica ta wordo kima di un forma cu no ta adecua ni higienico pa loke ta trata e medio ambiente.

Oduber a referi cu aworaki cu un incinerator moderno lo ta den construccion durante 4 pa 5 luna, pa elimina e ora ey e manera di atende e sushinan medico, humano y di (carcas) bestianan morto, cual no lo sucede mas di forma habri, pa percura cu esaki lo ta conforme normanan pa evita e dañonan cu a wordo haci na medio ambiente.

Asina mes, el a bisa cu e proyecto aki tin un inversion di 1.8 miyon di florin. Di otro banda Serlimar tambe a inverti mas o menos un miyon di florin pa actualisa e sistema, y di e forma ey por atende oportunidadnan nobo pa Serlimar, y di otro banda crea a posibilidad di negoshinan nobo, di documento confidencial cu mester wordo kima of otro servicio, por ehempel di cuminda cu ta wordo confisca cu no ta bon pa consumo humano.