No pa prome biaha Aruba ta manece cu e noticia tristo di un persona cu a fayece a consecuencia di no haya ayudo medico. Den e caso lamentabel aki tabata trata di decision (eroneo) di un medico pa nenga e persona tratamento. A base di kico el a yega na e conclusion ey lo ta suheto na investigacion di e autoridadnan concerni. Riba su mes ta remarcabel cu tabatin un medico presente. Den pasado a yega di sucede cu ta un nurse ta tuma e decision di no admiti un pashent, ya cu e tempo ey no tabatin medico presente na tur momento. Pero aparentemente esey tampoco no a yuda den e caso aki, ya cu igualmente no a yuda e persona, cu e consecuencia mas grave posibel.
Cu pa e famia esaki ta inaceptabel y cu nan lo bay exigi cu e caso aki ta ser investiga den tur su detayenan ta logico. Pero esey no ta tur. Banda di mustra simpatia y compasion cu e famia, ta importante pa exigi cu ta bin un analisis profundo di e proceso di atende pashent na tur e entradanan di servicio medico. Loke mester sigura ta cu un proceso adecua di verifica ki problema un persona por tin, y esey no puramente dor di observa e persona di un distancia, pero haciendo cierto control necesario pa por evalua cada caso na un manera corecto. Awendia ainda ta depende demasiado di con ‘mondig’ e pashent of su acompañante ta, pa percura cu e ta ser admiti.
Nos ta na altura di e intentonan di ministro di Salubridad Publico pa crea un inspeccion independiente pa e sector medico y ta apoya esey. Pero awor caba tin instancia cu simplemente mester haci nan trabao y percura pa e caso, si esey ta rekeri, cana su caminda te na “Tuchtraad” eventualmente. No mester sucede cu aki un of dos aña ta cuminsa lanta pregunta den prensa, con a para cu tal caso, pasobra no a tende nada mas…
Pero nos no mester laga e asunto na un incidente den sector medico. Pasobra segun nos opinion, esaki ta resultado di un mentalidad generalisa den gobernacion, unda basicamente ta pensa cu ta e ciudadano t’ey pa gobernacion, y no cu gobernacion t’ey pa pueblo. No ta den sector medico so e cosnan aki ta pasa, solamente cu den e caso manera esun aki e consecuencianan ta hopi grave mes. Na mas di un ocasion nos a comenta riba e hecho cu cada biaha nos como ciudadano ta ser confronta cu e necesidad di mester paga mas pa mantene henter e aparato gubernamental, mientras cu no ta mira un adelanto den e servicio cu ta duna. Y hopi biaha e no ta trata di e mal servicio di un of mas individuo cu a lanta cu mal beis e dia ey, pero mas bien ta fayonan grandi den set up di e servicio na publico, pa cual ta e directornan ta responsabel, y finalmente esun politicamente responsabel ta e ministronan, cu mester exigi un miho nivel di servicio.
Si nos haci e prueba awor mes: cuanto biaha den e ultimo aña aki nos a tende un mandatario papia riba mehoracion di servicio? Asina leu cu nos ta corda, ministro encarga cu Financia y Recurso Humano a referi na esey, tratando di kita e filanan interminabel di pago di number di auto for di caminda. Nos tur sa kico a para di esey, mescos cu e otro intentonan cu e tabatin pa simplifica e sistema di impuesto. Nos no mester ta di acuerdo cu tur loke el a trece dilanti, pero sikiera tabata mira un ministro intentando yega na gobernacion mas apropia.
Pero tumando henter gobernacion den su totalidad, nos no ta mira tanto avance, y aki ta unda e problemanan financiero ta impedi pa mehora, pasobra mehora costa placa, y placa t’ey aparentemente pa paga salario so di un monton di hende politicamente bon conecta, en bes di percura pa e recursonan pa por modernisa y drecha servicio na publico. Na varios servicio publico ta bisto cu falta e sistema digitalisa pa por traha miho, cu no t’ey o mester mehoracion, pero no tin recurso financiero pa haci esaki. Y no ta alternativa tampoco pa nos bay paga mas, pasobra esey no ta duna ningun garantia cu e placa lo ser uza corectamente pa haci e modernisacion necesario.
Pa bolbe na e caso lamentabel cu a surgi e siman aki: no ta trata di solamente e eror cu un persona a comete. Ta trata di e ambiente den cual ta traha, unda un persona por considera normal pa atende un caso di e forma cu el a haci’e. No ta trata di sanciona e persona ki so, sino di mehora e sistema di traha introduciendo un etica di trabao corecto cu ta percura pa e tipo di caso aki no tuma luga, dunando cada persona, pa humilde o problematico cu e ta, un trato manera debe ser. Den tur sistema, esaki ta responsabilidad di e hefe; ta p’esey ta paga su persona.
