Incertidumbre… E unico factor constante…?

Den un aña crucial manera esun aki, incertidumbre ta parce e unico factor constante. Presupuesto no ta solamente como mey aña laat, pero tin probablemente yen di sorpresa aden di e categoria ‘desagradable’. Mientras tempo ta pasa, gobierno ta insisti cu no ta duna claridad, manera mucha bon mucha nos mester warda 5 di december yega pa nos haya nos regalo. Pero e 5 di december simbolico, y esun berdadero, tur dos a pasa bay sin cu tabatin algo riba mesa. Nos ta tuma nota awor di e mandatario concerni cu e documento ta pega na Raad van Advies. Esey lo ta un descripcion eroneo di e situacion; mas corecto lo ta pa bisa cu nan tambe a hay’e laat y mester di tempo pa haci nan trabao. Ta gobierno mester percura pa tene cuenta cu ley y entrega e documento na tempo pa otronan por haci nan trabao.

Pero tin mas asunto cu ta trece incertidumbre. Por ehemplo, e medidanan fiscal cu lo a bin hunto cu e presupuesto. Nos sa kico e mandatario a comunica cu CAft, pero como cu e no ta elabora riba esaki, nos ta laga e tema sosega. Nos ta referi na e famoso BBO riba importacion, di cual nos no por a haya e detayenan. Probablemente ta nan mes a tarda pa dicidi kico pa haci, causando e retraso den entrega di e ley di presupuesto. Otro luna nos lo haya sa mas y nos por cuminsa averigua ki impacto tur esaki lo tin riba nos economia.

Sin embargo, tin mas preocupacion. Por ehemplo, a trata den un reunion ayera e rapport di Bo Aruba di Contraloria General. Por cierto un informe devastador unda practicamente tur e mal custumber y mala maña gubernamental ta bin dilanti. Awor, parlamento por a trata esaki, y lo tabatin hopi critica riba e gobierno di e tempo ey, y cu razon, pero… kico a mehora mientras tanto den e cultura di secreto y amiguismo den e cosnan aki? Kico nos a mira cambia den e manera cu ta recluta y evalua e personanan cu ta pone den e tantisimo consehonan di supervision y directiva di entidad estatal? Nos por keda culpa otro te Pasco mainta, pero ki dia ta cuminsa haci algo? Nos sa cu nos prome ministro regularmente ta duna catedra unda den su discurso e dos terminonan central ta integridad y transparencia, pero den practica nos no ta mira nada ta move.

Recientemente nos a indica tambe e sucesonan na Serlimar, unda ta ‘dump’ un director cu supuestamente no ta sirbi, esey riba su mes nos por kere, pero nos mester kere tambe cu e maneho na nivel di Conseho di Supervision ta fantastico? Nan lo ta tremendo, ‘ta djis placa falta’? Lo ta bon si Contraloria por dedica un investigacion na e maneho di e entidad semi-gubernamental aki, prome cu nos sigui tira placa den un bari sin bom. Y de paso para e tratamento di e ley mancaron ey, cu ta bay haci mas daño cu bon si e keda aproba manera cu e ta proximamente, segun e rumornan ta indica. Nos ta comprende e urgencia; Serlimar mester placa y loke e ciudadano no ta paga, gobierno mester pone riba mesa. Pero, si pasa e ley mes, ta tarda masha hopi mes prome cu e 80% cu no ta pagando awe, cuminsa paga normalmente. Tur e tempo ey gobierno lo mester facilita e cash flow necesario di tur manera. Pues por lo pronto no tin scapatorio, mester paga.

Otro factor di incertidumbre ta e disco raya di e refineria. E negociacion cu Citgo no ta parce di caba y nos por bien yega na e fecha final di e contrato sin cu tin un acuerdo. Mientras tanto, cualkier plan pa e tereno ta keda para, esun bon y esun malo. Malo den esaki ta e ilusion, den version berde o geel, cu algun dia nos ta mira un refineria nobo, o renoba, na Aruba atrobe. Ki dia ta caba cu e storia aki y ta cuminsa orienta riba algo diferente, y realista. E critica inutil di e ex-mandatario encarga cu energia riba Prome Minister como si fuera ta e no a percura pa Citgo opera, ta asina leu di e realidad di negoshi di petroleo na Aruba y den e region aki, cu no mester dedica tanto palabra na esey. Como medio nos a dedica hopi atencion den e ultimo añanan na e tema aki, y esnan cu ta sigui e tema aki di cerca sa cu no ta Aruba so, pero tur e refinerianan grandi di exportacion den e region aki ta den problema. Y di esakinan, esun mas mal manteni y cu poco opcion, ta esun di Aruba. Esun cu aparentemente no ta lesa corant no sa cu e collapse completo di Pdvsa a haci cu nunca nan a cumpli cu nan compromisonan contratual cu Aruba, y no solamente awor cu tin otro gobierno. E tipo di yoradera aki no ta yuda pa nada.

Di otro banda, e famoso lista di 25 interesado den e refineria di gobierno actual, te awe nos no a mir’e. Ta te ki dia nos mester soporta mandatario cu ta kere cu ta mucha chikito tin cu kier tende storia bunita prome nan bay drumi?