Diabierna ultimo 10 di juni, reportero di Bon Dia Aruba a haya e oportunidad di documenta un caso cu no solamente a causa polemica na Aruba, sino tambe na nivel internacional, den e cual por a mira con un decision di hues di Corte Prome Instancia a wordo viola y otro actonan condenabel di agresion a tuma lugar.

E caso aki a keda conoci den medionan na Aruba dia 31 di mei 2022, unda e hoben di nacionalidad Venezolano, Maykol H.R Chavez Bohorquez a graba un video for di centro di detencion di Guarda Nos Costa (HVB) na Dakota, na unda publicamente el a pidi minister di Husticia su colaboracion y intervencion pa pone su mes na altura di kico tabata pasando den Guarda Nos Costa. “Hefe Ras ta obliga mi firma mi deportacion” ta un di e declaracionnan cu Maykol a bisa den su video di mas di cinco minuut.

Chavez a drenta legalmente na Aruba dia 11 di februari di 2019, caminda el a pidi proteccion di refugiado cerca e funcionario di migracion na aeropuerto. El a yena un formulario di tres blachi solicitando e proteccion.

Tres aña Chavez tabatin wardando un contesta di DIMAS tocante su peticion di proteccion di refugiado.

Dia 25 di mei di e aña 2022, aki Chavez a ser deteni di manera ilegal. Despues dia 9 di juni hues di Corte di Prome Instancia, M.E Brown de Haseth a duna e libertad na Chavez di manera inmediato. Hues su decision tabata bisa: “verstaat dat verzoeker, voor zover hij nog in ophouding is, onmiddelliijk in vrijheid dient te worden gesteld”.

Ainda sabiendo e decision di hues honorabel De Haseth, funcionarionan di Guarda Nos Costa no a laga Chavez den libertad, pero nan a transport’e na un otro centro di detencion ubica na aeropuerto y nan a lag’e eynan deteni.

Diabierna ultimo 10 di juni, Guarda Nos Costa a presenta Chavez dilanti un hues comisario pa manten’e deteni pendiente di su deportacion, caminda A.J Martijn, e hues comisario a duna di conoce otro veredicto indicando cu Chavez su detencion tabata ilegal y a ordena su libertad di manera inmediato: “De rechter-commissaris acht de inbewaringstelling onrechtmatig en beveelt de onmiddellijke opheffing van de inbewaringstelling”.

E libertad di Chavez tabata un acontecimento traumatico pa tur esnan cu tabata presente; na momento cu el a logra sali for di e centro di detencion, Chavez a bira victima di agresion fisico y verbal di parti di funcionarionan di Guarda Nos Costa. Testigonan presente a wak con nan tabata scop y tira palabranan contra su persona.

Den e hecho aki, su mama Zuly Bohorquez – ken tambe a keda conoci den medionan di comunicacion siman pasa denunciando e caso di su yiu – tambe a wordo agredi di un manera hopi brutal door di un funcionario di Guarda Nos Costa, manera a keda demostra den un video cu reportero di Bon Dia Aruba mes a graba na e momento specifico ey. Tocante e agresion aki, Bohorquez a entrega un keho penal na Landsrecherche contra e funcionario.

No conforme cu esaki, reportero tambe a wordo pusha door di un funcionario di Guarda Nos Costa cu e obhetivo di stroba e trabao di prensa y reporta loke tabata sucediendo na e momento ey.

Ayera mainta, minister di Husticia, Rocco Tjon a duna un conferencia di prensa pa trece dilanti informacion tocante e caso specifico di Chavez. Den su declaracion, el a bisa cu pa loke ta trata asilo, ley ta duna autoridad pa por detene (ophouding) un persona cu pidi asilo, loke ta nifica cu ta den espera di e contesta riba su peticion.

Tambe el a comenta cu banda di esey ley tambe ta duna autoridad na momento cu un persona cu a drenta Aruba di un manera ilegal ta a wordo gara trahando, pa tene e persona aki pendiente di su deportacion (den inbewaring ter uitzetting). Ta dos circunstancia diferente y esey ta e motibo dicon hues a dicta cu Chavez mester a keda den libertad mesora dia 9 di juni. Segun minister Tjon mes a sigura, Guarda Nos Costa a laga Chavez den libertad e dia aki y na a pon’e den espera di su deportacion, mirando cu e persona a drenta varios biaha di un manera no corecto manera el a enfatisa y tambe a wordo gara trahando.

Mirando cu den nos estado di derecho y Constitucion di Aruba solamente un hues y un hues comisario ta esun cu ta priva hende di su libertad, den caso aki no solamente a pone hues y Corte di Aruba su cara na berguensa, pa motibo cu no a cumpli cu un orden di un hues, reportero di Bon Dia Aruba a puntra Tjon si ta Richard Kramers e persona cu no a cumpli cu e orden di hues y a keda detene un hende contra su boluntad, lo suspende Kramers of ta bay keda nada no ta pasa?

Pa cu esaki, minister Tjon a expresa cu “tur hende, no obstante su funcion, cu ta traha na un modo di bisa, den aparato gubernamental, tin leynan ta conta. Nos LMA ta splica exactamente ora bo haci algo fout kico por wordo haci na un manera disciplinario y den e caso aki tin un keho cu a wordo entrega na Landsrecherche y nan lo haci un investigacion penal. Obviamente cu investigacionnan aki keda cla lo wak kico ta sali afo y obviamente e maatregeling necesario lo wordo tuma si algo a bay fout”.

Tambe a puntra minister Tjon si por a splica e misterioso libertad cu Guarda Nos Costa a duna Chavez dia 9 di juni sin sak’e for di e custodia di Guarda Nos Costa of for di e cura mes di e centro di detencion, cu segun minister mes a sigura, cu nan a dun’e libertad inmediato e dia ey. Te ayera redactor di Bon Dia Aruba no a haya un contesta.