(ElNacional)—Na Venezuela tabatin al menos 74 conflicto laboral e luna cu a pasa, causa mas tanto pa e sector di educacion. Ora nan a computa e 138 conflicto en total, a mustra cu tin un reduccion di 46% compara cu april 2022, segun Observatorio di Conflictividad Laboral di Instituto di Estudios Sindicales Halto (Inaesin) a indica diabierna.
E reduccion tin di haber cu un “organisacion mayor di e sindicatonan, cual a recauda e kehonan for di varios sector” pa “pone nan hunto den e un solo causa,” e instituto a splica den un comunicado di prensa.
Di e manera aki, el a agrega, a observa un “participacion grandi di trahadonan den otro area cu no ta educacion, salud, negoshi basico y transporte,” manera empleado di companianan di electricidad y telecomunicacion. Esaki ta na banda di trahadonan independiente y pensionadonan, entre otro.
E organisacionnan sindical tabata presente den 59% di e protestanan, segun e instituto a señala.
E demanda pa salario apropia pa costo di bida tabata e “motibo mas grandi cu a hustifica e protestanan den 52.70% di tur caso”, sigui pa demanda pa “miho condicionnan di trabou” den 18.92% di tur caso y dispidimentonan, cual “ta representa 12.16%” di e totalidad.
Inaesin a agrega cu mayoria di e kehonan, registra principalmente den Estado Bolívar y Caracas, tabata entrega pa trahadonan den sector publico.
Trahadonan a sali protesta den e prome siman di mei despues cu presidente Nicolás Maduro a anuncia medidanan economico relata na e salarionan. E medidanan ta inclui e aumento den bonus di alimentacion di 1,8 dollar pa 40 dollas, cual e clase obrero a rechasa, yamando esaki un “tentamento” y “berguensa.”
E salario minimo ta keda na 130 bolívares, cual ta aproximadamente 5 dollar pa luna, segun e cambio oficial.
