Cu meta pa mehora servicio cu departamento di ambulance ta brinda na comunidad di Aruba, ImSan ta introduci un investigacion den forma di un encuesta pa pashentnan cu ta ricibi servicio di ambulance, pa determina a areanan cu mester mehora segun e experiencia di e pashentnan.

Hefe di departamento di ambulance, Liberato Hoek, ta splica cu den cuadro cu ImSan cu JCI accreditation nan mester cumpli cu algun exigencianan y un di esakinan ta cu nan mester haci un sondeo pa cu e servicio cu ambulance ta duna. Den e ultimo 20 añanan servicio di ambulance a conoce un desaroyo hopi grandi, tanto como den personal, educacion, material y nan ta sigui e mesun nivel di educacion y e mesun protocolnan cu na Hulanda.

Den cuadro cu esaki ambulance lo haci un sondeo entre e pashentnan cu ta ricibi cuido di ambulance. Hoek a indica cu e enfermero riba ambulance lo acerca e pashent pa pidi e cooperacion pa participa den e encuesta. El a enfatisa cu e encuesta aki no ta pa pashentnan instabil.

El a sigui splica cu na momento cu e pashent ricibi cuido di ambulance, e personal ta pidi autorisacion pa participa den e sondeo aki. E personal di ambulance lo duna e pashent un carchi y riba e carchi aki lo tin un QR code cu na momento cu e pashent scan e QR code e ta hib’e na e preguntanan di e encuesta.

E investigacion ta consisti di tres parti. E prome ta e proceso di e yamada na 911, e segundo parti ta e cuido den su totalidad y e ultimo parti ta na momento cu e cuido wordo traspasa pa e parti specialisa, pero tambe por tin personanan cu no ta wordo traspasa y pa e parti ey lo tin un sondeo tambe.

Hoek a remarca cu e participacion den e sondeo no ta obligatorio, e ta algo boluntario y e ta anonimo. Tin preguntanan na unda e persona por duna su opinion y el a subraya cu na momento cu mester duna opinion pa esaki ta al caso di e pregunta.

“Kico mi kiermen cu esaki. Si ambulance ta transporta bo, bo no por yena bo opinion cu ambulance no kier a hiba bo back cas pasobra nos no ta hiba hende back cas mientras bo no ta un persona cu ta na cama drumi. Nos ta pidi cooperacion di e publico pa por fabor yuda nos cu esaki, e ta e unico manera cu nos por tin un bista y evidencia di con e cuido ta aworaki, cua ta e areanan cu nos tin cu duna atencion na dje”, el a resalta.

Laura Tromp, verpleegkundige di ambulance, a splica cu un par di luna pasa nan a cuminsa pensa ki tipo di investigacion di calidad nan por cuminsa haci na ambulance y nan a haya e investigacion aki cu na Hulanda ta obligatorio pa ley cada tres aña den tur departamento di ambulance.

“Nos a tuma contacto cu e compania di investigacion cu ta haci e listanan aki y nan a duna nos okay pa usa e lista di pregunta aki. Conhuntamente cu un colega nos a adapta e investigacion aki na e cuido cu nos ta brinda aki na Aruba”, Tromp a indica.

El a remarca cu e lista di pregunta aki a wordo traduci na Ingles, Hulandes, Spaño y Papiamento pa asina tur pashent cu ta haya cuido, mirando cu Aruba ta isla multicultural, por tin e oportunidad di yena e encuesta aki.

Tromp a splica cu nan a exclui muchanan te cu 18 aña di edad. E motibo di esaki ta door cu nan experiencia ta diferente y nan ta experimenta cosnan diferente cu un adulto. Manera menciona caba, personanan cu ta hopi instabil nan a opta pa no inclui nan tampoco pasobra hopi biaha nan por tin algun problema neurologico of otro cos cu tin biaha nan no sa ki cuido nan a haya precies.

El a agrega cu nan a exclui tambe personanan cu a ricibi servicio di ambulance den pasado pasobra e investigacion aki uno actual y nan tin mas o menos tres siman caba ta mandando e lista di preguntanan na e pashentnan.

Tin dos manera pa yega na lista di pregunta pa e encuesta. “Nos ta manda e lista di pregunta via di number di telefon priva, p’esey nos ta puntra pa permiso pa cooperacion prome. Si no ta posibel pa haci esaki via telefon e momento ey, nos a traha un carchi cu tin un QR code cu nan por scan cu nan telefon pa nan por yega na e lista”, Tromp a aclaria.

E meta ta pa e investigacion dura mas o menos tres luna largo. Despues di tres luna departamento di ambulance lo wak tur e respuestanan cu nan a haya y di e respuestanan saca afo kico ta bayendo bon, kico ta bayendo menos bon, ki mehoracion nan por haci pa e pashentnan por haya e miho cuido posibel di ambulance.

Director di ImSan, Joel Rajnherc, tambe tabata presente durante e conferencia di prensa y el a subraya cu e encuesta ta pa yuda nan sa unda nan ta para awo cu e calidad di servicio cu nan ta brinda na e pashentnan na Aruba y con nan ta experiencia esaki pa den futuro nan por mehora.

Rajnherc a indica cu un reto grandi ta pa cera henter e servicio cu nan ta brindando pa henter e isla, incluyendo no solamente personanan ilegal, pero tambe e turistanan.

“Nos sa cuanto accidente ta yega cu turista, cuanto turista ta yega Aruba di edad mas halto cu mester di ayudo tambe. Esaki ta birando mas y mas complica, no problematico, pero complica y sigur cu e limitenan financiero cu nos ta den dje aworaki caminda cu mester reduci gasto y esey ta haciele hopi mas dificil”, el a enfatisa.

El a sigui splica cu antes nan tabata “hisa benta” pashent den ambulance y core bay hospital, pero esey no ta e cuido cu nan ta brindando mas. El a duna ehempel cu si un persona tin un ataca di curason grandi y mester di CPR, dos ambulance ta bay atende e pashent ey y tin tres ambulance so riba caminda.

“Si dos bay atende un persona, un ambulance so ta keda disponibel e momento ey pa full e isla y mirando e cantidad di ayudo cu nos tin cu brinda, nos ta yegando e momento na unda tres riba caminda no ta bay ta suficiente mas pa cubri henter e isla”, el a agrega.

Rajnherc a comenta cu nan ta den deliberacion pa wak con nan por yega na expansion, pero e ta un hecho cu mester di mas ambulance riba servicio. Segun el a indica pa traha 24/7 henter e aña nan mester por lo menos cuater, kizas cinco, pero esey ta depende tambe di con e desaroyonan ta sigui na e isla. “Esey ta bay costa placa, pero juist esaki nos kier saca afo a traves di e investigacion aki, unda nos ta para awo y kico nos tin cu haci pa mehora e servicio”, el a finalisa.