Ayera tardi, den presencia di un gran cantidad di invitado y personal di ImSan, a tene un ceremonia pa celebra e Gold Seal of Approval acreditation di Joint Commission International (JCI), un logro grandi pa e hospital na San Nicolas. Alabes, a desvela e Hall of Hope Joel Rajnherc, honrando e motor tras di e exito di ImSan.
Presente na e ocasion historico tabata minister di Salud, Dangui Oduber, minister di TINO y alabes vice-prome minister, Ursell Arends, minister di Educacion, Endy Croes, varios parlamentario, directornan, y personal di varios afdeling di hospital, kende a bin hunto pa e celebracion cu champagne y discursonan di felicitacion.
Minister Oduber a indica cu e acreditacion di JCI no ta wak solamente e calidad di cuido y servicio cu sigur ta di vital importancia, pero ta pone seguridad di pashentnan y trahadornan tambe como prioridad pa set e standard di mas halto cu por existi. Minister Oduber a splica cu pa haya e acreditacion aki no ta algo nada facil. Un acreditacion cu ta renombra mundialmente, ImSan ta e prome hospital cu e acreditacion aki den full e region di Caribe Hulandes. E mandatario a sigui bisa cu e standard cu ImSan a pone pa Aruba su calidad di cuido medico ta uno di nivel mundial. E ta e standard cu nos kier ofrece na nos aseguradonan pero tambe na nos bishitantenan. Cu esaki nos tambe lo bay explora turismo medico minister Oduber ta expresa.
E mandatario a reconoce e vision y perseverancia cu dr. Rajnherc Y su team a tabatin y a realisa pa awe oficialmente ImSan tin e JCI accreditation. Mester bisa cu esaki no tabata por ta posibel tampoco sin e vision di Ex Minister di Salud Publico sr. Booshi Wever (cu a forma parti di Gabinete Oduber 3). E tabata tin e determinacion y vision pa bin cu un Instituto Medico na San Nicolas.
Den su discurso, Rajnherc a recorda e historia y e lucha pa por yega na un hospital pa San Nicolas, destacando e perseverancia di henter e team di ImSan. Na momento cu a desvela e Hall of Hope Joel Rajnherc, henter e team a mustra nan sosten y cariño pa e director, kende tabatin lagrima na su wowo. Sigur un logro grandi pa cuido medico na Aruba y un bunita reconocemento pa e trabao incansable di trahadornan di salud.
