ImSan prepara pa cualkier eventualidad di carnaval

Temporada di carnaval a yega y mayoria di actividad di carnaval lo ta San Nicolas, sin conta e paradanan. A puntra ImSan si ta prepara pa cualkier situacion cu por presenta.

Director di ImSan, dokter Joel Rajnher, a splica cu hefe di departamento di ambulance, Liberato Hoek y hefe di medico di manager di SHE tin henter un plan hinca pa duna e miho cuido posibel.

A bisa si cu departamento di SEH ainda ta den construccion y no ta ‘ful habri ainda y renoba’, pero ta spera den algun siman esey por tuma luga. Pero na momento ainda no tin tur camber disponibel.

Sinembargo por haci tur sorto di prevencion alternativo y por atende cu pashent necesario. Nan tin suficiente dokter, enfermeronan y tur hende ta disponibel pa duna extra man ora cu mester.

Mescos pa e departamento di ambulance, nan tin suficiente hende y material. “Nos tin un dienstlijst caminda a base di cantidad di evento cu ta tuma luga pariba di brug, tin team den ful preparacion. Nos tin bon cooperacion di tur hende y ban spera cu alcohol y droga no forma demasiado problema.”

Rajnher a bisa cu ta prepara pa tur evento cu lo tuma luga na San Nicolas. Pa casonan ora ambulance ta core rond, ta pidi pa auto no blokia caminda. Sinembargo e ta bisa cu a mira cooperacion en general di poblacion. “Semper tin un of dos no ta coopera”, pero manera a mustra cu cuerpo policial tambe a duna bon man den casonan ey.

Tin bon relacion cu KPA pa situacion asina. “Nan ta haya aviso mesora y ta duna un man ora nan por, depende tambe con grandi emergencia ta. Den pasado nos a wak cu hopi biaha polis ta dilanti caba y cierto crusada ta habri, caminda ambulance por sigui su caminda sin problema.”

Semper por tin excepcion, esey ta cosnan cu por pasa. Pero den mayoria tin cooperacion y mas facilidad cu e green corridor, trafico ta miho pa guia pa por yega hospital Dr. Horacio Oduber y ta contento cu tur cooperacion di otro departamento.

Tambe ta sumamente importante pa hende ta mas atento pa ora di scucha, si nan wak cu tin sirena cerca of luz. “Tin hende cu por ta riba telefon y core auto, y no ta cu nan no kier hala, pero nan no ta ni ripara cu ambulance ta biniendo a pesar di tin sirena fuerte.”