Silenciosamente, durante ultimo añanan, impuesto riba ganashi (winstbelasting) a subi continuamente. Na 2010 por ehemplo e impuesto aki tabata na un nivel di apenas 84,7 miyon florin. Na 2014 el a yega na 169,9 miyon y a culmina na 2015 cu un solido 237,4 miyon. Den e ultimo caso aki, e suma extra aki a yuda gobierno cera buki basta bon, banda di e ‘regalo’ di SVb di 61 miyon florin cu gobierno a pordona su mes. Mientras cu na 2010 impuesto riba ganashi tabata solamente 7,9% di e total di entrada di belasting, na 2015 esaki tabata nada menos cu 22,9%. Detaye interesante ta tambe cu na 2010 entrada di belasting tabata como 38 miyon mas cu na 2015. Sorpresa? Talbes, pero laga nos tira un bista.
Un di e cambionan grandi cu a tuma luga den impuesto riba ganashi ta e sistema di cobra. Anteriormente bo ta yena bo papelnan y entrega esaki na Servicio di Impuesto. Cu un retraso grandi algun aña despues bo ta haya notificacion di loke bo mester paga. Por ta cu na e momento cu bo mester paga, ya bo empresa no ta den mesun situacion bon manera algun aña atras, tempo cu bo por a haci un bon ganashi. Sin embargo, lo ta bon pa bo tin e reservanan financiero pa paga dia cu bo mester paga y no a haya bo obliga di uza esaki pa tene e negoshi moviendo.
Tur esey a cambia desde aña pasa. Awor bo mester declara bo ganashi pa mas tarda fin di mei, anto paga di biaha e suma declara. E metodo aki tin su bentaha tambe pa e empresario, cu no ta keda confronta cu obligacion di pago na momento menos oportuno despues. Pero mas cu tur cos gobierno a haci esaki pasobra e tabatin bentaha grandi pa caha di gobierno. Specialmente ora cu na ultimo momento na 2015 a introduci e pago mediato aki, loke a ocasiona un entrada grandi extra na december. Na 2015 a cobra impuesto riba ganashi pa aña 2014, y pa añanan anterior segun e metodo bieu. Esey a causa un ‘one time bubble’ den e aña ey. Gobierno (y CAFT) a keda contento cu esey, pero kico lo bay pasa den futuro? Pasobra ta obvio cu si bo a cobra ayera caba, mañan bo no tin nada di haya. E añanan anterior cu tabata pendiente ta caba na cierto momento y bo ta cay bek riba cobranza di un solo aña, segun e sistema nobo.
Esey efectivamente ta parce e caso. Pa 2016 caba gobierno ta conta cu un entrada na impuesto riba ganashi di 195 miyon, como 42 miyon menos cu aña pasa. Pa 2017, ta anticipa cu esey ta bay ta menos ainda, mirando e hecho cu otro aña ta cobra a base di con economia ta bayendo e aña aki, plus algo di e añanan atrasa ainda. Por observa cu, salvo un crecemento modera den turismo, inversion y consumo a cay den e aña aki considerablemente, cu consecuencia pa rentabilidad di hopi negoshi. Y kico tur esaki ta significa pa caha di gobierno? Cu un di e fuentenan cu durante e ultimo añanan a crece di menos di 100 miyon te na mas di 200 miyon aña pasa, lo bay baha te na un nivel mas modera, net ora cu ta necesario conta cu mas entrada stabiel, pasobra segun plan mester casi yega na un presupuesto balansa otro aña. Y esey ademas di extra gasto cu ta bin aden, di cual ta dificil pa scapa.
Anto e ora e pregunta ta bira kico ta bay bira e siguiente ‘money maker’ pa gobierno permanece a flote. Di e famoso ABB, cu ta un cambio drastico y complica, nos no mester papia mas, ya cu e ta un medida cu gobierno no por ‘bende’ cu e votado. Hende cu no ta interesa den tur detaye di e wega ta dificil pa convence cu un ABB di 7% ta ‘menos’ cu un BBO/BAZV di 3,5%. Esey ta exigi demasiado creatividad, hasta di un tremendo tirado di discurso manera nos Ministro Presidente. Un opcion di cual ta cuminsa tende mas atrobe, ta e impuesto riba transaccion bancario. E ta facil pa cobra, ta na cuatro banco bo mester acudi, y e ta bon scondi den cada transaccion cu nos haci na banco… ‘easy money’! Loke no ta asina faborabel ta pa introduci cualkier medida cu eleccion hopi cerca caba. Ningun gobierno cu ta busca reeleccion mester warda te ultimo aña pa tuma medida, pasobra hende mester di tempo pa lubida, y tin basta cos acumula caba pa lubida.
Den e sentido aki, ya ta birando laat pa cualkier paso cu kier tuma, y anto e reapertura di e refineria ta bira mas urgente ainda pasobra no tin otro ‘lifeline’. Ademas ta asina cu den un economia cu ta caba den un spiraal bayendo abao, medida den forma di cualkier impuesto tin como consecuencia cu actividad economico ta baha mas ainda, y mas medida lo significa menos entrada pa gobierno, na luga di mas. Sano huicio lamentablemente ta algo cu bo no por haya via impuesto.
