Pa mantene un budget neutral den presupuesto

E echo cu den e prome fase di e reforma fiscal cu lo drenta na vigor entrante 1 di januari lo tin un rebaho riba e belasting personal, esaki lo costa Gobierno 14 miyon Florin riba reduccion di loonbelasting y inkomstenbelasting.

Reaccionando riba oposicion cu a cualifica e fase aki como un medida camufla, caminda Gobierno ta duna di un banda y kita for di otro banda, e Prome Minister Evelyn Wever-Croes a bisa cu “si algo ta costa Gobierno placa e no por ta medida.”

El a declara cu si oposicion ta cualifica e reforma aki riba belasting personal como un tipo di medida, esaki ta depende kico bo ta defini como medida. E ta acepta cu na momento cu un persona su impuesto ta subi cu 1 Florin e por wordo considera como un medida. “Nos no ta gaña. Nos ta hopi habri riba esey. E ta bay subi pa algun hende,” el a declara. Pero e mester ta asina si nan kier bah’e pa otro hende.  Otro alternativa lo ta keda sin haci nada y lag’e manera e ta. Pero e ta haya cu e situacion aki no por sigui asina ya cu e sistema ta hopi anticua y complica y mester di cambio.

E prome mandatario ta reconoce cu Gobierno su situacion financiero ta ‘delicado.’ P’esey pa e budget keda neutral nan a bin cu e manera pa haya e 14 miyon Florin bek. E no ta haci niun impacto riba e presupuesto. Entre otro riba SIN TAXES cu lo wordo cobra via accijns y invoerrechten riba esunnan cu ta scoge pa uza alcohol y sigaria. Pero tambe riba e tarifa di e grondbelasting pa esunnan cu no ta biba na Aruba. Kier men esunnan cu ta bin di afo pa inverti den cas, condominio y propiedad comercial.

“E resultado final ta keda igual. Bo ta subi akinan y baha eynan. Ta  esey loke nos a haci cu e reforma fiscal,” el a bisa. Nan ta moviendo e peso di belasting directo pa esun indirecto. “Nos ta kere cu ta mas husto pasobra mas hende ta bay contribui cu nos sistema di belasting,” Premier Wever-Croes a declara.

No ta cuestion cu Gobierno ta duna sino cu e ta laga di haya di un banda pero ricibi di otro banda, ya cu esaki no mester costa Gobierno placa mirando su situacion di austeridad. El a indica cu Aruba mester cumpli cu e deficit y e normanan di LAft (Landsverordening Aruba financieel toezicht) pa evita problema.