Importancia di… Kita incertidumbre…

Nos tin mas di cinco luna den e crisis actual y ta cuminza ripara cu hende ta cansa. Cansa di kico? Di e noticianan tur dia di e coronavirus na nos pais y tur otro? Por ta.

Tur dia como medio di comunicacion nos ta cumpli cu nos deber di trece noticia, di aki y di exterior, y tur caminda e pandemia ta noticia number un. Den e cinco lunanan ey nos a pasa di un lockdown completo, cu toque de queda anochi y shelter in place, pa un reapertura cu un minimo di daño. So far, so good, nos a pensa, pero e parti duro mester a bin ainda. Y awor nos ta meymey di e parti ey. Cu resultado cu nos no sa unda nos ta para. Nos ta logra domina e situacion aki dentro di un luna, dos, tres…? Nos no sa, y segun nos esun cu bisa cu si e sa, no sa tampoco. En todo caso, nos no a mira nada di esey ainda.

Loke ta tumando lugar actualmente ta intento di controla e situacion cu nos tin, di mas di mil caso activo, cu por desenboca den un fluho demasiado grandi pa nos servico medico, principalmente hospital. E cantidad di pacient cu Covid cu mester di hospitalisacion ta subiendo, pero te awor aki na un ritmo cu por maneha ainda. Ban spera cu esey ta keda asina. Sin embargo, speranza no ta suficiente, sa unda nos ta bay lo yuda bastante. Y ta esey ta loke falta. No solamente nos no sa unda e pandemia aki ta hiba nos den e proximo lunanan, pero tur cos cu ta hasta remotamente relaciona cu esaki ta incierto.

Por ehemplo, no tin un claridad riba tereno economico unda nos ta bay. Ta obvio cu sin ayudo externo, y esey por bin di un banda so, di Hulanda, nos no por recupera, es decir, sin perdida grandi economico cu ta toca empresario y empleado pareu. Kico esey ta ocasiona? Cu tur hende mester anda cu cuidao, pa no gasta placa cu cos innecesario, pasobra nos no sa unda nos ta para aki un par di luna. Mucho menos por predeci unda nos ta para pa fin di aña, si no ta bin claridad kico ta e perspectiva nos dilanti. Nos no ni mester encuesta pa nos sa con ta para cu e actitud di e consumidor o empresario na e momento aki, aunke semper ta bon pa haci nan si. Di tur manera, nan lo confirma loke nos ta bisando aki. Awor, pakico ta asina importante pa kibra e racha di incertidumbre ey? Pasobra tantisimo vez a keda comproba cu un ambiente positivo, cu confianza den economia, ta un di e estimulonan mas grandi cu un economia por haya. Naturalmente e optimismo no por ta basa riba nada, e mester tin un base real.

Awor ta bin e pregunta clave: con nos ta yega na optimismo? Con nos ta logra haya sa ki rumbo – positivo – por tin pa nos, si nos logra domina e pandemia y lo por cuminza reconstrui nos economia? Esaki ta un contesta so e tin: Nos politiconan mester mara nan carson y tuma e decisionnan necesario pa nos haya ayudo cu nos mester, pa e ciudadano tin un perspectiva, no di desempleo, pero e perspectiva real cu e por keda traha y cria su famia. E empresario cu ta casi na punto di cera su negoshi, pa e dicidi cu e ta purba wanta un poco mas, anticipando cu cos ta bay drecha. Pero pakico ta sigui alarga e incertidumbre aki? Solamente pa satisface esnan entre nan cu ta yorando nos ‘autonomia’? Pa nan ta facil papia asina, pasobra nan lo ta e ultimonan pa keda sin salario. Tin momento cu nos ta pensa cu nos politiconan, salvo algun excepcion, no tin e minimo idea kico ta tumando lugar den nos economia. Claro cu e ayudo di subsidio di salario, cu na promer momento hasta gobierno no tabata kier a implementa, ta un di e korkinan cu tin un bon parti di e empresanan a flote, pero pa cuanto tempo mas? No ta salario so ta paga, tin hopi mas gasto, hasta si un empresario dicidi di ‘mothball’ su negoshi en espera di mihor tempo. Di tur manera, segun cu tempo pasa e ‘destruccion di capital’ ta birando mas grandi, y lo afecta nos no solamente awor cu desempleo creciendo, sino tambe despues pasobra lo requeri inversion nobo pa build up loke a bay perdi.

Kico tur esaki finalmente ta implica? Cu nos ta para na un momento casi historico unda mester tuma decision duro pa contene e daño cu ta creciendo cu tur dia cu pasa. Nos ta yegando na e momento cu nos politiconan mester dicidi pa nan mes con nan kier pa historia huzga nan: como esnan cu a keda contribui na incertidumbre, y cu esey strobando perspectiva riba un cambio positivo; o nan ta dicidi di haci lo necesario pa nos por tin sikiera un vista positivo di loke nos por haci den e proximo lunanan. Parlamento supuestamente ta consisti di persona cu mester reflexiona y actua riba nan mes. Disciplina partidario awor ta casi irelevante. Nan ta bay actua? Ta ora pa lubida siguiente eleccion y haci lo corecto.