Diamars mainta, a tuma lugar e Terrestrial Management Plan Workshop. Aruba Conservation Foundation a organisa e workshop, cual a keda presenta door di Sr. Lawrence Jones-Walters di Natural Dialogue, y Sr. Bernie Fleming di Fleming Ecology.

Minister di Naturalesa, Ursell Arends (Raiz) a inicia e tayer cu un discurso conmovedor subrayando e tarea importante di e maneho di areanan natural comparti, y cu pa logra esaki lo rekeri colaboracion na un manera inclusivo cu tur stakeholder.

Den su discurso e la menciona cu e tema di naturalesa ta uno personal, unda e ta refleha riba su experiencia den e industria di turismo. “M’a wak e daño cu nos como ciudadano, como corporacion y como gobierno tabata haci, den nos buskeda di desaroyo economico. E realisacion a haci un impacto riba mi cual motibo ma dicidi di risca tur cos y drenta politica. Mi tabata firmemente kere cu nos mester un cambio, cu naturalesa tabata mester di un voz — un stoel na e mesa unda decision nan importante ta wordo tuma”, Minister Arends a remarca.

Como Minister di Naturalesa e la duna di conoce cu a siña hopi mas tocante Aruba su herencia natural. Door di su rol, e la descubri tesoronan cu e no tabata conoce anteriormente, pero tambe e la bira mas consciente di e perdidanan y menasanan cu nos naturalesa ta enfrenta. E minister a duna como ehempel e populacion di shoco, un di nos tesoronan cu ta bou di hopi stress, cu ta obliga nos pa crea neishinan artificial pa nan, segun a nota den un comunicado di prensa.

E plan di maneho cu ta discutiendo durante e Terrestrial workshop ta esencial pa compronde nos ecosistema y pa haya un balans entre nos realidad actual y preservacion natural. Minister Arends a enfatisa cu “nos tin hopi trabao nos dilanti den e prome 10 aña nan pa coregi y restaura e dañonan cu nos tur a causa.” Pa pone esaki den perspectiva, e minister a usa e historia di lora como un tremendo ehempel – di extincion pa reintroduccion, 70 aña despues. “E historia bunita aki ta mustra cu nos por surpasa, coregi y restaura, si nos plania adecuadamente y pone man na obra. Y e unico manera pa haci esaki ta hunto.”

Por ultimo Minister Arends a invita tur esnan presente pa uni forsa den e creacion di e plan di maneho di areanan natural aki. Asina resaltando cu e aportacion y esfuersonan di awe lo ta fundamental pa e desaroyo di un strategia oficial y lo garantisa un maneho responsabel di e areanan. Dunando chens na Aruba su naturalesa pa florece.