Den un ciclo di articulonan semanal cu Bon Dia Aruba ta haci cu entrevistanan tambe tin algun di nan cu ta resulta educativo, pa muchanan, famianan y mayornan vooral den tempo aki cu pronto scol lo cuminsa.

Resiliencia ta e capacidad di enfrenta diferente contratiempo, e personanan resiliente tin un ekilibrio mayor emocional ora tin cu haci confronta situacionnan di stress, soportando un presion hopi halto.

E mundo por resulta un luga hopi peligroso, na e momentonan aki diferente situacionnan ta existi como guera, terorismo, secuestro infantil, entre otro, cu a defini un panorama di evolucion pa educa e famianan, aunke no ta posibel pa protege e muchanan di circunstancianan di bida, sinembargo, ta posibel educa muchanan capaz di adapta nan mes y supera retonan na unda por ofrece na nan e hermentnan cu nan tin mester pa responde e desafionan di adolescencia y ora nan lo bira adulto pa nan por tin exito.

No por evita e diferente situacionnan cu ta presenta den bida diario pero si por siña con por ta mas optimista y cambia e manera con nan ta pensa riba desafionan y contratiempo.

Famianan actual, vooral muchanan tin un stress grandi cu por deteriora nan salud fisico y su bienestar psicologico, den mundo actual muchanan y adolescente mester desaroya fortalesa y adkiri hermentnan pa enfrenta, pa recupera di diferente reto y pa nan prepara pa futuro desafionan, nan mester ta optimista pa haya exito den bida aki.

Mayornan por usa algun di e tipnan aki pa nan desaroyo como nan lo por enfoca den nan fortalesa individual, tambe mayornan por autorisa nan pa por tuma decisionnan, mester tin cuidou den e deseo di protege hopi e mucha pa esey no mand’e un mensahe robes cu e no lo ta capaz di maneha e situacion, asina como tambe reconoce e habilidadnan di su rumannan di manera individual y evita di haci comparacion entre nan.

Tambe, reconoce ora e mucha ta haci algo bon, duna un pabien honesto ora e ta logra cierto metanan, dun’e confiansa pa e por haci su best pero sin pone presion riba dje.

Desaroya vinculo cu algun familiar y comunidad ta crea un sentido di siguridad cu ta yuda pa guianan nan cu balornan, mayornan tin cu crea pa nan un sentido di siguridad fisico y siguridad emocional den nan hogar, permiti pa nan expresion di tur nan emocion, pa cu nan lo por sinti comodo durante un momento dificil, fomenta un relacion saludabel cu por wordo reforsa cu mensahenan positivo.

Muchanan mester fomenta un grupo solido di enseñansa y balornan pa determina kico ta corecto y kico no, pa fortalece e caracter di su yiunan tin cu cuminsa demostra con ta afecta e comportacion di otro hende, e mucha mester reconoce su mes como un persona amabel, demostra cu comunidad ta importante, desaroya espiritualidad y hopi importante evita sentimento como racismo of critica pa motibo di religion, sexo of status.

Pa un mucha ta mas resiliente den e bida aki mester reconoce su sentimentonan, yuda nan reconoce y papia di dje, incluyendo sentimento negativo, asina como tambe mayornan tin cu papia cu nan tocante nan fortalesa pa asina nan por haya sa con esey ta yuda den situacionnan dificil.

Mester motibo nan pa pidi un ayudo, nan tin cu sa dificultadnan of ora tin un kibocacion cu esey no ta un señal di debilidad, pidi ayudo ta un fortalesa. Puntra nan kico nan mester pa supera un situacion of mehora algo.

No semper muchanan lo haya sa cu e personanan rond di nan ta duna un palabra di animo, mayornan tin cu duna di conoce pa nan cu nan t’ey pa duna su apoyo, tur loke por haci pa construi un conexion cu ta transmiti amor pa nan lo duna mas fortalesa.

Sentido di humor ta un di e caracteristicanan principal di un persona resiliente, si nan ta hari di nan mes y ta wak e banda leuk di e situacion, esey ta faborece nan adaptacion pa diferente situacion y pa esey mayornan por yuda nan alimenta nan sentido di humor a traves di nan conducta y a traves di bukinan infantil na unda ta papia riba resiliencia y por busca e banda leuk di un situacion.