Desaroyo di habilidadnan social durante epoca infantil y hubenil ta esencial pa cu e mucha lo modela su conducta mediante educacion y experiencianan diario.
Un di e areanan cu ta esencial pa muchanan train, algun biaha no ta wordo considera suficientemente importante e cual ta e area social.
Ta necesario pa siña muchanan for di chikito pa nan usa habilidad social, cu despues lo yuda nan establece nan relacionnan interpersonal mas positivo y pa nan siña y incluso disfruta di convivencia cu otro personanan, entre e areanan cu tin cu wordo desaroya den muchanan ta empatia y positivismo, esey ta fundamental pa nan desaroyo.
Ta existi hopi manera pa yuda e muchanan mehora nan habilidad social, incluso un di nan ta importante y cu den algun biaha ta wordo lubida ta mediante ehemplo, ya cu mayoria di nan aprendisahe ta wordo desaroya mediante observacion y imitacion di comportacion.
Den actividadnan cu muchanan por desaroya nan habilidadnan social ta actividadnan deportivo, mayornan por inscribi e muchanan den actividadnan deportivo pa nan siña un deporte nobo, nan ta relaciona cu otro di un forma sano cu personanan di nan edad y di e forma aki tambe nan ta siña realisa actividadnan den ekipo por medio di e cual nan lo aumenta e positivismo y empatia.
Otro actividad cu nan por haci ta pa asisti na mas eventonan social cu por ta posibel, por ehemplo, nan ta asisti na fiestanan di hacimento di aña, ricibimento, graduacion, familiar, pa asina ey nan siña interactua den diferente ambiente cu otro personanan.
Educa balornan por medio di ehemplo, manera a wordo menciona caba, muchanan ta siña hopi specialmente di loke nan ta wak y ta normal cu nan ta imita e adultonan, den caso aki e mayornan. Ta p’esey cu ta importante pa educa muchanan cu balornan por medio di ehemplo, ya cu no por pidi un mucha pa ta amabel y respetuoso cu otro hende si e mesun adulto no ta haci’e.
Fomenta un bon autoestima, pa tin un miho autoestima ta esencial pa relaciona di un bon manera cu otro hende. Ta necesario cu for di chikito, e mayornan ta inculca den e mucha cierto balornan como cuida su mes, importancia di su imagen y amor propio, di ki manera por haci’e? Cuidando y respetando e mucha, siñando e manera con pa cuida su mes y respeta su mes, ta recomendabel pa cuminsa haci’e for di cuater aña.
Na scol, por utilisa frasenan positivo cu ta wordo usa pa faborece empatia y practica di balornan como respet y reconocemento personal, ta p’esey cu ta wordo pidi na muchanan pa forma un circulo y nan ta bay pasando un bala di plastic, ora ta wordo pidi pa stop, esun cu a keda cu e bala na e momento ey, mester eligi un compañero pa haci algun actividad of bisa un frase positivo.
Si un mucha no ta implementa habilidadnan social loke por pasa ta cu e por desaroya comportacion agresivo of violento, “faborece e baha autoestima, no sinti sensibilidad na e resultado di su accionnan y tampoco tin tolerancia pa frustracion”, e tipo di muchanan aki ta presenta dificultadnan pa scucha.
Muchanan awendia a nace den un era cu tecnologia ta intermedia den relacionnan social di un forma sin precedente, cambionan di manera di interaccion social ta hopi lihe, cu tin biaha cu tin hende cu no sa con pa maneha e mundo tecnologico. Antes, normanan social tabata valido, pero awor parce cu a disparce, kiermen cu tecnologia a cambia e manera cu personanan ta interactua cu otro y cu nan a perde of transforma e normanan social y balornan.
Mientras cu sociedad ta avansando pa e individualismo, algo cu tampoco ta yuda.
Si mayornan ta pone den practica solidaridad, empatia, ta yuda un persona cu tin mester, ta duna y comparti y ta scucha, poco poco muchanan por ta consciente pa pone den practica actitudnan na fabor di e sociedad y asina fomenta e desaroyo di nan habilidadnan social pa haci nan ta emocional y socialmente un persona mas positivo.
Practica un actitud amabel y generoso cu otro hende por yuda pa tin miho relacionnan social y di e forma ey nan por siña ki comportacion nan por tin den algun situacion.
