CBA y CBS no ta presta normal?
E siman aki (dia 20 di october) nos por a aprecia e celebracion di Dia Internacional di Estadistica, celebra specialmente pa Banco Central di Aruba cu diferente orador cu a elabora diferente topico interesante al caso. Como un di e dos entidadnan cu ta responsabel pa estadistica importante pa nos economia – e otro ta Oficina Central di Estadistica (CBS) – ta parce cu CBA ta masha consciente di e peso grandi di e responsabilidad aki.
Nos por ta completamente di acuerdo cu den bes en cuando ta bon nos para keto y enfatisa tur esaki, pero kico realmente ta pasando den practica? Pasobra no ta palabra bunita so ta marca paso ora di evalua, sino prome cu tur cos den ki sentido ta cumpliendo cabalmente cu e tarea bon señala aki. Ban tira un bista.
Desde basta tempo caba nos por observa, y cu ‘nos’ den e sentido aki nos ta papiando di tur hende den sector publico y priva cu regularmente mester di estadistica pa nan trabao, preparando plan di negoshi o rapport pa nan entidad o empresa, cu e website di CBS ta down. Nos no sa cuanto tempo e ta bay tarda ainda prome cu e website ta bek den aire, pero aparentemente e lentitud den remedia e situacion ta refleha un falta di interes o comprension con importante esaki ta, o ta e caso atrobe cu tantisimo cos den gobernacion ta pega riba e cantica di semper:’no money’. Nos no a mira e gerencia nobo di CBS tampoco drenta publicidad disculpando nan mes y brindando alternativa pa e clientela cu talbes ta mas grandi cu nan mes ta kere. Desde algun tempo por cierto a reemplasa e director masha profesional y aprecia pa esunnan cu conoce su trabao, cu un ‘management team’ di tres persona, cu aparentemente entre nan tres no por yena e sapatonan cu el a laga atras; en todo caso nan no a ni comenta riba e problema existente di no por comunica cu e mundo eyfo.
Parce cu e fenomeno aki di ‘management team’ por cierto ta di moda: nos por corda e guera cu a ser hiba contra e direccion di Servicio di Impuesto algun aña atras, unda esaki tambe mester a traha luga pa un managment team di varios persona. Nos no a haya di tende oficialmente nunca cu un di acusadonan a gana su caso despues di varios aña y awor ta traha pa Pais Aruba atrobe: pabien. Tambe nos ta tende nos mandatario encarga cu Energia conta cu awor tambe a yega e momento pa WEB Aruba NV haya un management team na luga di e director cu a bay cu un ‘golden handshake’… Ta di spera cu e asunto di management team no resulta nada mas cu un manera pa recompensa persona liga na e partido den gobierno cu por haya puesto bon paga sin cu nan cansa nan curpa di mas, y naturalmente pa anos como pagado di belasting carga cu e consecuencianan financiero.
Den e caso di Banco Central por observa un silencio un poco straño, memey di tur e turbulencia riba tereno financiero di ultimo añanan, unda sigur ta omiti pa critica gobierno pa su maneho financiero, unda den pasado nos a mira otro Banco Central.
Nos ta referi na hendenan manera Du Marchie Sarvaes, Mehran y Rob Henriquez, cu tabata considera nan tarea pa avisa ora gobierno ta bay den mal direccion y tabata para pa nan opinion, no matter what. Pero esey no ta tur. Nos ta awor yegando fin di october y ainda Banco Central no ta publica cierto cifra clave pa comercio, y pa tur ciudadano tambe. Eseynan ta cifra di entrada y gasto di gobernacion, un pieza clave pa por ehemplo den comercio por mira cu nos economia ta bay bon, a base di cierto desaroyo den impuesto di importacion, BBO, impuesto riba salario, etc. Si nos tira un bista riba e ‘Charts & Trends’ ultimo di inicio di october di e aña aki, nos por mira cu masha hopi item tin dato bastante bieu, sin cu tin un splicacion pakico no tin dato mas al dia disponibel.
Awor, di dos cos uno ta berdad: of Banco Central no ta haya e datonan di gobierno y p’esey no por publica, of nan a haya nan pero a opta pa no publica. Den ambos caso, nan debe nos un splicacion, pasobra no tin pakico acepta cu no ta comparti e informacion aki cu publico en general, ta p’esey nan t’ey. Di tur manera, si Banco Central no por haya e cifranan corespondiente na tempo for di gobierno, ta nan tarea, den nos nomber, pa denuncia esey. Nos no a tende di esey ainda.
Ta masha facil pa, completamente den e estilo di e gobierno aki, celebra tur sorto di fecha pa crea impresion positivo, ta mes of mas importante pa percura pa den practica haci e trabao pa cual salario cu placa di pueblo ta ser paga.
