Importancia den desaroyo di comunidad artistico

ORANJESTAD – Edjean Semeleer, di fundacion GoCultura, kier conscientisa comunidad tocante e importacia di aporta den desaroyo creativo, innovativo y artistico.

Semeleer ta bisa cu e idea ta pa yega mas leu den e desaroyo di persona. E ta bisa cu si hende tin un proyecto, anto e persona no sa con pa presenta esaki, nan ta duna idea y asisti pa haci un exito. “Di e banda ey ami ta bira sumamente inspira y creativo.”

Segun Semeleer tin hopi artista den e plataforma cu ta creando. Nan t’ey pa duna otro oportunidad, pa e motibo aki e ta bisa pa persona compronde cu no solamente e ta bay traha cu musica, e instrumento of e vocalista, pero tambe cu bailarinnan, poetanan, declamado, diseñado di moda y joyeria, artista di makiyahe, y mucho mas. E ta bisa cu tin varios persona cu por resalta y cu tin hopi disciplina.

Sinembargo, pa haci un plan posibel, tin den comunidad no ta mira e balor ainda, mas den e parti di sector comercial. “Pa e motibo aki nos ta conscientisa. Tin compania cu ta wak e importancia di creatividad, pero tin esunnan cu no. Nos no ta tuma na malo. E ta comprendibel cu promove un producto ta un desafio pa haci negoshi na Aruba, pero nan como empresa tin cu compronde cu si nan no ta parti di desaroyo di bo hendenan, e lo bira pio y desafiante pa habri negoshi aki na Aruba.”

Segun Semeleer, ta existiendo pa varios aña caba cu no tin forma pa yuda e artista pa e por yega mas leu. E ta puntra ‘ki influencia creatividad tin den bo bida’. E ta continua bisa cu den comunidad local, tin importancia, sea den pintura, lectura, radio, television y mas.

El a continua bisa cu na Aruba tin hende cu tin talento, pero ‘tiki plataforma’ pa hendenan expresa nan mes y nan talento. “Nos hendenan no ta sinti e inclusion di algo mas grandi. Un meta hunto, cu proposito den nan bida. Nan ta djis bibando na Aruba, nan por haci algo pa nan supera y yega na un maximo potencial.”

Tin artista cu ainda ta observando e fundacion. Un sentimento cu nan mester haya mas cos, ‘artista ta hopi sensitivo’. Segun Semeleer ta bisa nan no kier ta parti pa motibo di ta desapunta. “Cuminsa mira den e direccion, na e punto cu ta beneficia nos tur. Trabou ta importante, ingreso ta importante, e bienestar di ser humano ta mas importante; hunto cu esaki e salud mental.”

Semeleer ta agrega cu esaki ta yuda desaroya y traha preventivo den arte. E ta duna ehempel cu fundacion cu ta traha cu problema di salud mental, ‘un gran mayoria di terapia’ nan ta haya arte. E ta bisa cu ta ‘impresionante ki habilidad e pashentnan aki tin’. Tin terapia musical, artistico, aunke ‘mucho hende no ta compronde cu e ta asina’.

Sinembargo, e ta bisa cu mester keda conscientisa cu ‘placa no ta tur cos’. E salud mental di hendenan ta mas importante, anto si e ta bay cu arte, esey ta e solucion. Segun Semeleer, e ta frustrante pa wak con nan ta pone cu cultura ta e ‘dianan tradicional di Aruba, cultura ta mas cu esey’.

Pa finalisa, Semeleer a bisa cu cualkier fundacion cu tin un mensahe positivo, nan lo traha cu nan of cera aliansa cu nan. “E causa cu nos por kere aden, asina recauda e fondo necesario. Nos no ta kere den competi, pero crece hunto cu otro pa e bon causa.”

Tin tres meta cu Semeleer ta splica mester activa, pa locual na Aruba no ta conoci ainda. Un ta economia oraño, cual ta economia impulsa door di industria creativo y cultural. Un economia cu ta stimula e industria basa riba creatividad, conocemento na tur e disciplina cu ta contribui na genera algo cu ta crea empleo, ingreso y un impacto social grandi na e pais.

Semeleer a bisa cu ainda Aruba no ta duna arte importancia, y cu ‘falta hopi trabou’. E ta continua splica cu den nan opinion, e situacion social cu Aruba ta aden tin cu wordo impacta pa cosnan mas positivo.

Na Aruba, Semeleer ta remarca cu esey ta e problemanan cu artistanan tin. “Nos tin potencial aki, pero hende mester di trabou pa motibo cu tur cos ta depende di turismo. Pa e motibo aki, Gocultura kier sali di inkietud cu mas por wordo haci, y nos ta desea di haci hopi mas.”