Desde luna di october di aña pasa SIMAR ta forma parti di e comision cu ta trahando na restructuracion salarial di e sector di enseñansa di Aruba institui pa Mininster di Enseñansa. E comision aki ta consisti di e representante di Departamento di Recursonan Humano, Bureau Wetgeving/ Juridische Zaken, Bureau di Minister di Enseñansa, Departamento di Enseñansa, Sindicato SEPPA y Sindicato SIMAR.Segun Sra. Maroeschka Cornelie e meta inicial di e comision tabata pa implementa e restructuracion aki dia 1 di augustus.
Diferente trabou a ser culmina caba, pero tin varios factor cu pa motibonan fuera di alcance di e grupo a presenta na ultimo momento cu mester di atencion debido. Un punto hopi importante pa clarifica ta cu e comision no ta trahando na aumento salarial, sino na un structura salarial di e empleadonan den enseñansa. Te cu awe, e docente su salario ta mara na entre otro edad y e ta vries na un cierto momento sin posibilidad mas den adelanto financiero.
E structura nobo ta percura pa un miho balans entre empleadonan y pa posibilidad di crecemento den entrada y posicion dependiendo di e empleado su empeño den su tareanan. Importante ta pa ripiti cu ningun empleado lo bay atras den salario. Mirando e importancia pa e implementacion tuma luga na un forma responsabel y debidamente cu tur componente completa, Minister a dicidi di pospone e fecha di implementacion pa 1 di januari 2017.
Mas informacion tocante detayenan di esaki Directiva di SIMAR lo duna na su debido tempo y simultaneamente cu tur “stakeholder” concerni, manera palabra den e comision. Riba e pregunta di cu si e asunto di restructuracion salarial ta algo nobo, Sra. Cornelie a contesta cu sigur cu no. E ta un asunto andando ya desde añanan ’90. Desde october cu a institui e comision, informacion a ser publica na diferente ocasion y a ser manda pa miembronan. Mester remarca si cu hopi maestro no tin e informacion corecto y specialmente esunnan cu no ta miembro di SIMAR ta carece di tal. Pesey, entre otro, ta bon pa afilia na SIMAR pa ta bon informa y pa sostene e sindicato den su trabou cu ta pa bienestar di e empleado mes
