Den cuadro di loke gobierno a decreta como Aña di Innovacion, prome minister, Evelyn Wever-Croes a duna mas informacion riba e proceso di e-Government.

Pero tambe a invita e hoben Amedee Wever di Futura pa asina hunto nan a lansa e competencia ‘100 Innovations’ den cual lo premia e 100 miho ideanan/solucionnan di innovacion. Esaki lo yuda pais Aruba logra e metanan di sostenibilidad global di Nacionnan Uni.

e-Government.
Premier Wever-Croes a bisa cu gobierno ta considera innovacion hopi importante pa desaroyo di nos pais. Y aunke nos no tin e fondonan pa realisa e proceso aki hopi lihe, pero nan lo haci nan best cu locual cu tin. Den e proceso di digitalisacion aki nan kier pone e ser humano central pa facilita y trece alivio cerca nan den nan bida cotidiano. “Esaki ta e meta tras di e-Goverment,” el a bisa.

E ta e sistema di digitalisacion di procesonan den aparato gubernamental. Den cuadro di esaki, prome mandatario a bisa cu e siman aki ta uno importante debi cu nan ta teniendo e ultimo consultanan cu tur e stakeholdernan pa nan por yega finalisa e road map. Ademas varios proyecto piloto ta finalisando entre nan, esunnan di intercambio di data digital entre varios departamento cu ta haci e proceso mas sigur y instantaneo entre nan.

Tambe den e dianan aki ta tumando un tayer cu presencia di director di e-Government Academy na Estonia pa tur departamento di gobierno, pa nan ta bon informa y prepara pa loke el a cualifica como ‘ola di transformacion’ cu e-Government ta trece cune. Intencion di gobierno ta pa brinda mas servicio online e aña aki y facilita e servicio aki pa nos ciudadanonan.

Futura.
Amedee Wever a duna mas detaye di e programa ‘100 Innovations’ di Futura. E ta un competencia a traves di cual na fin di aña 2020, nan kier logra 100 idea cu ta ehecutabel of factibel pa realisa den direccion pa logra nos meta di Sustainable Development Goals di 2030.

El a splica cu e tres meta cu e competencia aki tin ta entre otro: nos planeta y medio ambiente, e di dos ta ser humano y di tres ta prosperidad. E registro pa participa pa esun di planeta ta habri for di dia 18 di maart y e ta tuma luga na april y mei. E di dos tema cu ta ser humano (people) y e ta tuma luga na juni y juli. Esaki ta abarca ideanan cu tin di haci cu tur ser humano cu ta biba na Aruba, ya sea local of bishitante. E di tres tema ta prosperidad cu ta inclui ideanan cu por yuda diversifica nos economia y digitalisa hopi di nos procesonan.

Pa cada ciclo e participantenan por registra y Futura tin un pagina di Facebook ‘100 Innovations’, caminda bo por haya mas informacion. Amedee Wever ta invita tur hende di Aruba, pero tambe sector publico y priva, scolnan, NGO’s, fundacionnan y sector academico pa participa den e competencia aki pa logra 100 idea di innovacion 2020.