Instituto Hulandes di Neurociencia ta kere cu implantenan celebral recien desaroya por hacie posibel pa persona ciego por recupera un sorto di vision.
E implante nobo ta hacie posibel pa reconoce imagen y obheto sin involucra e wowo en absoluto. E resultadonan ta prometedo segun e Instituto.
Ta usa e implantenan den cortex celebral, e parti di celebro cu ta procesa informacion visual entre otro. E idea aki ta bay back na añanan 1970, pero e implantenan desaroya pa Instituto Hulandes di Neurociencia usa mas electrode cu loke tabata posibel anteriormente.
E team di investigacion a pone e implantenan cu 1,024 electrode den cortex celebral di dos macaco no-ciego. E macaconan a ricibi un tarea simpel prome, di reconoce un spot briyante genera cu un electrode, y despues nan mester a distingui formanan y letternan mas completo crea pa varios electrode. E macaconan tabata capaz tambe di reconoce lineanan y puntonan mobil crea pa electrode.
“Nos implant ta conecta directamente na celebro, lagando un banda e etapanan di procesamento visual di e wowo of nervio optico”, investigado Xing Chen a bisa na NOS. “Den futuro, tecnologia asina tambe por ser usa pa restaura e vision di hende cu a bira ciego como resultado di un lesion y deterioro di e retina, wowo of nervio optico,pero cu nan cortex virtual ta intacto.”
Segun e investigadonan, nan estudio ta pone e fundacion pa desaroya prostetica cu por permiti hende ciego mira funcionalmente atrobe, reconoce obheto, y nabega ambientenan desconoci.
