E tratamento – deep brain stimulation, DBS – pa largo ta wordo uza pa problemanan manera Parkinson’s. Awo, e prome test clinico di DBS pa adiccion na methamphetamina ta tumando luga na Ruijin Hospital na Shanghai, hunto cu test paralelo pa adiccion na opioide.
E cirugia ta envolve planta un aparato cu ta fungi como un sorto di pacemaker pa e celebro, stimulando areanan electricamente. Mientras intentonan den mundo West pa bay dilanti cu test humano di DBS pa adiccion a faya, China ta emergiendo como un ‘hub’ pa e investigacion aki.
China tin un historia largo, y problematico, di cirugia celebral pa adiccion. Hasta awe, e leynan fuerte anti- droga por forsa hende bay den añanan largo di tratamento obligatorio, incluyendo ‘rehabilitacion’ mediante labor. Nan tin un poblacion grandi di pashent, fondo di gobierno, y companianan di aparato medico ambicioso cla pa paga pa investigacion di DBS.
Tin ocho test clinico registra pa DBS pa adiccion di droga tumando luga rond mundo, segun un base di data di U.S. National Institutes of Health, di cual seis ta na China.
Pero e sufrimento treci pa e epidemia di opioide por cambia e calculo di riegso- recompensa pa dokter y reguladonan na Merca. Na februari, FDA a aproba un test clinico na West Virginia, di DBS pa adiccion na opioide.
Na China, prome cu implante celebral, tabatin ‘lesion di celebro’. Famianan desespera di usuarionan di heroina tabata paga miles di dollar pa cirugianan riesgoso y no proba, den cual dokternan tabata destrui pida chikito di tehido celebral. Lesion di celebro rapidamente a laga atras un fila di pashent cu desordo di animo, memorianan perdi, y funcion sexual altera.
Na 2004, ministerio di Salud Chino a ordena pa stop lesion celebral pa adiccion na mayoria di hospital. Nuebe aña despues, dokternan na un hospital militar na Xi’an a reporta cu casi mita di e 1,167 pashent cu a ricibi lesion celebral a keda sin uza droga pa sikiera cinco aña.
DBS ta basa riba e historia ey. Pero a diferencia di lesion, cual ta mata celnan celebral ireversiblemente, e aparatonan ta permiti intervencion cu ta – en teoria – reversibel. E tecnologia a habri un campo di experimentacion humano globalmente.
E cirugia tin riesgo. Tin un chens chikito di morto pa motibo di hemoragia. Cambio di personalidad, ‘seizure’, of un infeccion. Y na final, tin riesgo di relapse den droga.
Critica
Algun critico ta kere cu e cirugia aki mester ta prohibi. Nan ta argumenta cu experimentonan asina ta prematuro, y no lo adresa e factornan compleho biologico, social y psicologico cu ta conduci na adiccion. Cientificonan no ta compronde completamente con DBS ta traha, y ainda tin debate tocante unda mester pone e electrodenan pa trata adiccion. Tambe tin skepticismo den comunidad cientifico global tocante e calidad general y rigor etico – particularmente tocante asunto manera permiso informa – di e testnan haci na China.
E fracaso di dos test clinico Mericano grandi riba DBS pa depresion, como cinco aña pasa, a causa un ‘soul-search’ tocante ki nivel di comprension cientifico mester wordo alcansa pa por diseña experimentonan efectivo, y etico.
Sinembargo na China, e cientificonan ta bayendo dilanti.
Morto
Segun e U.S. Centers for Disease Control and Prevention (CDC), mas di 500,000 Mericano a fayece pa sobredosis di droga den e decada cabando na 2017 – cada bes mas pa via di opioide sintetico cu ta bin principalmente for di China. Esey ta mas cu e cantidad di soldaat Mericano cu a muri durante Segunda Guera Mundial y Vietnam combina.
E cantidad di fayecido a duna urgencia na esfuersonan pa busca tratamentonan nobo, mas efectivo, pa adiccion. Mientras dokternan na Merca ta interesa den uza DBS pa adiccion, trabou financia pa U.S. National Institutes of Health ainda ta enfoca riba experimentonan riba animal, no hende.
Sikiera dos laboratorio Mericano a stop test clinico di DBS pa alcoholismo, pa motibo di preocupacion tocante e diseño di e estudio y resultadonan preliminario cu no a hustifica e riesgonan, segun e cientificonan liderando e estudio a bisa AP.
