(InfoBae).- Un cartel di narcotrafico na Mexico ta manera un hidra (animal di siete cabez, di mitologia Griego). Den un decada, violencia a registra mas di 193.000 morto y 30.000 hende cu a desaparece, segun cifra oficial e cantidad di grupo criminal a subi y mesun momento ta dividi den grupo mas chikito.

Actualmente no tin un cifra oficial ni ningun conclusion entre specialista den e materia aki. Recientemente Francisco Torres Landa, secretario general di fundacion di Mexico Uni Contra Delincuencia a sigura cu e cantidad di banda criminal cu ta opera na Mexico a subi te 400 den solamente 10 aña.

Un di e gruponan cu a aparece recientemente ta na un lugar cu tin frontera cu e capital di e pais aki, y a ser identifica pa autoridadnan como un cartel nobo conoci como Nuevo Imperio. Autoridadnan ta pensa cu e cartel aki a surgi despues di e separacion di cartel di Sinaloa, cu un tempo tabata lidera pa Joaquín “El Chapo” Guzmán Loera, cu awe ta deteni na New York.

” E situacion ta causa pa e division den varios grupo chikito, ocasiona pa e ausencia di un cabes di e cartel aki; esaki a produci diferente interes y hopi problema pasobra nan kier a haya mas beneficio na diferente lugar distribui geograficamente,” Juan Francisco Torres Landa, secretario general di e organisacion civil Mexico Uni Contra Delincuencia, a splica.

Cartel “Nuevo Imperio”a cuminsa opera un par di luna pasa, despues cu polis a detene e suheto conoci como “El Quinceañero”, operador di Dámaso López “El Mini Lic”, yiu di otro lider di cartel di Sinaloa, un periodista anonimo a splica.

E grupo aki ta relaciona cu 13 asesinato cu a tuma lugar recientemente na municipio di Huxquilucan y Naucalpan y cu “narcomantas” (mensahe riba papel grandi, pega na lugarnan publico), presente na diferente municipio di ciudad di Mexico.

“Despues di e captura di El Quinceañero a bin e prome narcomanta di e cartel Nuevo Impero, caminda tabata menasa tur otro grupo cu ta opera den e zona ey,” e periodista a splica.

Resultado di investigacionnan cu autoridadnan a cuminsa despues di varios homicidio y diferente narcomensahe riba dia 9 di october, Alejandro Gomez, fiscal di estado di Mexico a informa di e detencion di 7 posibel integrante di un banda na municipio di Cuautitlán Izcalli, norte di ciudad capital di Mexico.

Den su poder nan tabatin arma cortico y largo, cargadornan, municion, droga, telefon, paña pa operacion tactico, papel cartulina cu mensahe di menasa y tres auto. E cartel nobo ta dirigi pa un homber cu nan a identifica den narcomanta como Comandante 7.

“Narcomensahe”, un prome mirada

Autoridad a haya sa di e grupo criminal aki pa varios mensahe cu tabata riba papel y cu a ser haya na diferente zona di estado di Mexico, caminda cartel Nuevo Imperio ta opera.

Autoridadnan ta sigura cu integrante di e grupo aki ta exigi placa di varios comerciante y asina ta pone presion pa paga un ‘derecho di piso’ (manera nan ta yama e servicio di seguridad cu nan ta duna como recompensa pa e pago). Nan ta responsabel tambe pa varios homicidio cu a tuma lugar e aña aki.

Luna di augustus ultimo, na municipio di Cuautitlán Izcalli, polis a haya un mensahe cerca di un homber asesina cu signo di tortura. Na Huixquilucan otro manta a ser colga na un brug cu ta situa na un zona residencial. Otro mensahe riba diferente curpa asesina a aparece tambe na Tlalneplantla, Naucalpan y Atizapán.

Na Atizapán a ser deteni na luna di juli ultimo Nahúm Abraham Sicairos Montalvo, miho conoci como El Quinceañero. E ta identifica como operador financiero di Dámaso López Serrano, miho conoci como “El Mini Lic”, yiu di “El Licenciado” Dámaso López Núñez, homber importante den e cartel di Sinaloa.

Cartel di Sinaloa a ser funda 27 aña pasa, como un organisacion di trafico di droga na Mexico. E detencion di su lider Joaquín “El Chapo” Guzmán a produci un etapa di division interno y hopi problema entre nan, segun autoridadnan.

Awor e control di e cartel ta un lucha entre yiunan di Chapo, entre nan Iván y Alfredo Guzmán Salazar, miho conoci como Los Chapitos; y Dámaso López Serrano y otro operadornan di confiansa di Ismael “El Mayo” Zambada.

Expansion

E entidad Colectivo di Analisis di Seguridad cu Democracia di Mexico (Casede) a traha un documento conoci como Atlas di seguridad y defensa di Mexico 2016, caminda nan ta bisa cu Mexico tin identifica 6 organisacion cu ta dedica na trafico di droga na aña 2006 y cuatro aña mas laat esaki a subi te 10, segun Bruce Bagley, specialista di seguridad di Universidad di Miami.

Despues, un informe di Procuraduria General di Mexico di aña 2014 a registra cerca di 9 cartel cu ta controla 43 banda criminal cu ta opera na Mexico.

Aunke tur analista di seguridad ta duna un opinion diferente, varios investigador manera Jonathan D. Rosen y Roberto Zepeda, ta splica cu “nan ta di acuerdo cu 13 di e cartelnan tin suficiente elemento cu por permiti nan participa den suceso violento.”

Sin embargo e cantidad aki ta parce un tiki inocente en vista di un analisis cu a sali na luna di juli 2017, di e organisacion Causa Comun, cu ta papia di un expansion di narcotrafico na Mexico y su capital.

Causa Comun a revela cu na luna di mei 2014, 9 organisacion criminal tabata participa den 81 municipio di estado di Mexico, y Ciudad di Mexico. Nan a bisa cu tabatin presencia di crimen organisa na Iztapalapa, Cuauhtémoc, Gustavo A. Madero y Tláhuac.

Awe tin 14 organisacion criminal operando na 96 municipio di Mexico y 10 di nan tin presencia den 16 municipio mas di e capital di Mexico.

“E situacion ta grave pasobra den 70 municipio ta opera mas di un organisacion criminal, situacion cu ta aumenta e posibilidad di lucha pa teritorio,” Víctor Manuel Sánchez Valdés a skirbi den su analisis.

Torres Landa, di MUCD, ta pensa cu e division di e grupo criminal den grupo mas chikito ta e respuesta na e politica a corto plazo cu gobierno federal, estatal y municipal a implementa.

Ora cu a presenta e resultadonan di un encuesta riba percepcion di seguridad na Mexico, cu ta traha pa mas di 10 ana caba, e resultado tabata cu Mexico tin como 6 of 7 cartel cu ta purba di reparti e control di e pais.”

Awor tin mas di 400, y tal situacion no lo spanta autoridadnan pasobra e nivel di violencia ta crece y e control di tur e bandanan ta bira mas dificil dia pa dia, Torres Landa a splica.