Proximo siman, un otro grupo di beursalen ta bay for di Aruba – y otro islanan di Caribe Hulandes – pa continua nan estudio na Hulanda. Pero e partidonan den coalicion di gobierno Hulandes a introduci un reto adicional. Siman pasa, noticiero Hulandes NOS a publica un articulo indicando cu studiantenan cu ta mas cu un aña atrasa den nan estudio ta bay tin cu paga 3mil euro adicional riba nan studiegeld. E aña academico aki, e studiegeld ta 2,530 euro.

E castigo pa tuma mas largo pa gradua ta bay drenta na vigor pa aña academico 2026-2027, y ta spera di genera 282 miyon euro pa aña pa cahanan estatal, segun calculacionnan di e partidonan di coalicion, cu a introduci e medida. E implementacion exacto di e aumento ainda mester keda anuncia, pero organisacionnan estudiantil na Hulanda no ta na fabor di esaki, y partidonan di oposicion tambe a bin cu pregunta durante e debate parlamentario.

Nieuwsuur a papia cu dos investigador specialisando den bienestar di studiante tocante e reintroduccion di e castigo pa tuma mas largo pa gradua. Nan ta kere cu e aumento ta bay pone mas presion riba un grupo cu, segun e investigadornan, ya tin hopi reto.

Jolien Dopmeijer ta un docente na Windesheim Universidad di Ciencia Aplica y ta bin investigando salud mental di studiante pa diescinco aña. E tambe ta involucra den e encuesta anual nacional riba bienestar estudiantil cu ta bin ehecutando desde aña 2021.

November ultimo, a keda revela cu 44 porciento di studiantenan di educacion avansa encuesta a experimenta ansiedad of depresion. E studiantenan a reporta cu ta sufri di presion pa prestacion halto y stress, entre otro.

Sophie Leijdesdorff ta un docente di universidad riba salud mental di hoben y ta traha como psicologo pa hoben. “Studiantenan ta reporta cu nan ta drumi malo, ta preocupa hopi, y tin biaha tambe tin problema financiero. Stress di estudio hopi biaha ta cita como e causa,” el a bisa NOS.

E investigadornan ta kere cu un castigo pa tuma mas largo pa gradua solamente lo aumenta e presion riba studiantenan. Segun Dopmeijer, “investigacion ta mustra cu hopi biaha ta circunstancianan personal, hopi diverso cu ta causa cu studiantenan ta tuma mas largo pa completa nan estudio. Y pa algun studiante, por ta hopi beneficioso pa studia mas largo, permitiendo nan desaroya na nan propio velocidad.”

Resultado
 Na 2010, e castigo pa tuma mas largo pa gradua tambe tabata inclui den acuerdo di coalicion di gabinete Rutte I. Esaki a resulta den protesta grandi na Den Haag e tempo ey. Despues di caida di e gabinete aki na 2012, a elimina e castigo retroactivamente.

Sinembargo, e castigo si tabatin un efecto e tempo ey. Na 2012, mas studiante di universidad a obtene nan Bachelor’s of Master’s degree cu den e aña academico anterior. Di otro banda, mas studiante tambe a drop out di nan estudio, por asumi, pa miedo di e castigo.

“Intencion tabata pa curasha, pero en practica, el a resulta den studiantenan descurasha,” segun Dopmeijer. “Mi ta compronde cu e partidonan kier atende studiantenan cu ta tuma mas largo pa gradua pasobra e ta costa institucionnan educativo hopi placa. Pero na lugar di castiga studiantenan, e scolnan mester ricibi e recursonan pa yuda nan crusa e linea final.”

Den e debate parlamentario riba e acuerdo principal, lider di D66, Rob Jetten a dirigi na lider di NSC Pieter Omtzigt riba e reintroduccion di e castigo pa tuma mas largo pa gradua, bisando: “Den añanan recien nos a pone hopi presion riba e generacion di studiante. Despues di e generacion di mal suerte, pronto nos lo por tin un generacion di burnout pasobra nos ta introduciendo algo cu mi a pensa cu nos a deshaci pa semper.”

Omtzigt no a yama e castigo pa tuma mas largo pa gradua su medida faborito den e acuerdo, pero si a hay’e defensible: “Hopi programa ta costa pagadornan di impuesto cinco biaha mas cu loke ta costa pa studiantenan. Mi ta kere cu bo por pidi studiantenan pa completa nan estudio dentro di e duracion di e estudio plus un aña, bao circunstancianan normal.” E lider di NSC ta bisa cu lo considera excepcion den implementacion di e medida.

Impacto riba studiantenan di Caribe

Den un articulo di Caribisch Netwerk skirbi pa Kim Henriksen, ta nota cu segun Jean-Marie Schmidt, un docente senior na Universidad di Rotterdam di Ciencia Aplica, studiantenan Caribense, en particular, ta bay ser perhudica.

E articulo ta nota cu studiantenan Caribense hopi biaha tin dificultad cu e transicion for di nan pais pa Hulanda. Ta spera nan di ta independiente, pero no ta siña esaki den nan educacion. Schmidt a splica: “Den scol secundario, tin hopi structura den educacion. Maestronan ta duna e structura aki,” agregando cu “den educacion avansa, e studiantenan mester haci hopi mas riba nan mes. E libertad repentino aki por ta abrumante y contribui na retraso den estudio.”

Ademas, studiantenan di Caribe no tin e mesun acceso facil na nan red di sosten, por ehempel, door cu nan mayornan y famia no ta biba na e mesun pais.

E articulo di Caribisch Netwerk ta nota cu pa ta exitoso, studiantenan Caribense mester di habilidad y sosten specifico. Schmidt ta enfatisa riba e importancia di educacion den meta-cognicion y habilidadnan meta-cognitivo, tanto na cas como na scol. “Nos ta spera pa studiantenan ta independiente y depende riba nan mes, pero nos no ta siña nan con pa hacie,” e ta splica. “Nan mester siña con pa plan y maneha nan propio estudio.”

Adicionalmente, tin un necesidad pa educacion den meta-cognicion – e habilidad pa reflexiona riba bo propio pensamento y proceso di aprendisahe.

“Mester siña studiantenan Caribense meta-cognicion pa asina nan por siña con pa maneha independientemente nan propio proceso di aprendisahe,” Schmidt a bisa. “Esaki ta rekeri esfuersonan di tanto scol y universidadnan Hulandes como e sistema di educacion na e islanan Caribense y gobierno.”

Schmidt ta bisa tambe cu mester di mas inversion den training di maestro riba e islanan, y den sosten di mayornan, ya cu mester siña e studiantenan e habilidadnan meta-cognitivo for di un edad trempan. “Ademas, mester desaroya y implementa intervencion den educacion.”

Schmidt ta reconoce cu gobierno Hulandes tambe tin un rol, haciendo un yamado pa mas colaboracion y inversion pa sigura cu e studiantenan Caribense ta ricibi e sosten cu nan mester.

Pa finalisa, Schmidt ta bisa cu si lo por mehora e sistema di educacion riba islanan di Caribe Hulandes cu un enfoke riba habilidadnan meta-cognitivo, e studiatenan “no lo ni mester bin Hulanda.”

“Durante mi bishita di trabao na Sint Maarten, mi a mira con educacion den meta-cognicion por duna resultado rapido. Cu e inversion y colaboracion corecto, nos por sigura cu e studiantenan Caribense haya e habilidadnan y sosten cu nan mester pa alcansa nan potencial completo. Esaki por no solo mehora nan futuro individual pero tambe tin un impacto positivo riba sociedad en su totalidad.”

Mientras tanto, e studiantenan ta depende riba nan mentor y red di sosten, manera famia y amistad, pa yuda nan nabega e retonan mental y emocional di un estudio avansa na un pais leu di cas.