Fundacion ‘Heart Centered Leadership’ a tene nan conferencia di prensa pa anuncia e seminario ‘Impact Camp’ cu lo tuma luga dia 9 te cu 11 di augustus pa hoben di 15 – 21 aña di edad pa asina empodera hoben pa sigui desaroya den bon caminda.

E fundacion a lanta na 2008 cu meta pa empodera hoben cu nan programa, entrenamento, seminario, y programa despues di scol. Nan ta ofrece e hoben guia individual y den grupo, pa yuda nan traha riba nan desaroyo personal

Keyla Rojas, coordinador di proyecto den e fundacion, ta splica cu e programa cu nan ta sigui, ACE, ta para pa Achievement (logro) Commitment (compromiso) y Excellence (excelencia). Un programa cu nan ta sigui for di Los Angeles EduCare foundation.

Rojas ta expresa cu nan ta kere den generacion di hoben cu ta representa tres ‘R’, cual ta respetuoso, responsabel y resiliente, ‘pa nan keda firme para riba nan sapato’.pa locual nan por encontra den bida

E ultimo 7 aña a traha cerca cu e fundacion di Los Angeles pa asina sigui ofrece e programa pa diferente scol secundario di Aruba. Abraham De Veer, cu a hay’e na April, Maria College, Filomena College, middag Mavo y Colegio San Nicolas.

Sinembargo, nan a haya mayornan cu kier pa nan otro yiu experiencia e programa. Pa es motibo nan a bin cu seminario, pa asina duna oportunidad na 100 hoben di cualkier scol of bario por participa.

Ashna Thijsen, coordinador di hoben, a splica cu e seminario lo ta interactivo, dibertido y pa desaroyo personal. Tambe pa yuda e hoben haya e balor di autoestima y amor propio. “Tin diferente herment cu hende mester den nan bida pa sigui cu nan trayecto di bida”, Tijsen a expresa.

Thijsen ta continua bisa cu nan a logra pa e proyecto ta un di e 10 ganado di Pitch Time. Pa es motibo a haci e ‘Impact Camp’ den colaboracion cu Marriott. E seminario lo dura di 9or di mainta te cu 4:30 atardi, na e ballroom di Marriott hotel. E costo di participacion ta 250 florin. Tambe por haci areglo di pago na esunnan cu ta cay mucho pisa.

Nathan Tromp, boluntario den e fundacion, tabata den posicion di Pitch Time pa conta su mesun experiencia. “Mi a bay e seminario 3 dia, mi por bisa cu en berdad e ta yuda mas tanto riba mi persona den motivacion, confiansa den mi mes. Con pa yuda bo mes pa asina por yuda otro.”

E punto di enfoke ta, cu den su experiencia den ACE, por wak for di comienso te na final un cambio den ‘bo yiu’, agregando cu e diferencia ta positivo, e hoben ta mas habri cu su mayornan.

Tromp ta remarca cu e mes no tabatin un bon comunicacion cu su mayornan. Despues di e curso, el a cuminsa tin e curashi di papia cu su mayornan di cualkier problema of cosnan cu e por a sinti tabata mester di un cambio.

“Ta importante pa mas seminario asina bin Aruba, pa motibo cu no solamente ta drecha e comunicacion cu mayor, pero tambe cu relacion cu docente, pareha, famia y mas. Ta sinti manera bo ta keda trankil, y purba compronde situacion di bida cu nos ta bibando aden”, Tromp a splica.

Pa finalisa, Rojas a agrega cu e programa ACE tambe ta enfoca riba e crisis social cu ta andando na Aruba. Anto e por yuda e hoben. E ultimo 5 aña, nan a keda activo ta traha cu programa pa yuda e prevencion di hoben cu ta ‘dropouts’, esta laga scol sin cab’e.

Nan a traha cu 3 scol secundario pa asina ofrece guia individual y den grupo na hoben cu riesgo cu lo por kita for di scol. E 5 criterio ta cu hoben ta confronta cu situacion na cas, situacion na scol, kico tin pafo di su cas cu ta pone drop out- sea e tin cu traha pa extra placa na su cas, of el a cay na estado. E ultimo ta idioma. Idioma di instruccion cu e por demotiva e hoben, pasobra e no ta compronde anto e ta sinti e tin cu traha demasiado duro pe.

Na 2017 nan a traha un seminario na Filomena College cu un grupo di 40 hoben, pa splica tocante idioma instruccion di Hulandes na scol. “E factor di instruccion pa compronde e material 100% nan tin cu keda na scol pa traha riba dje y bay dilanti.”

Den resultado nan a yega di wak un hoben cu tabata den lista preto pa sak’e for di scol. Pero bou di guia den grupo, seminario cu el a sigui cu e fundacion, a pone cu e hoben a continua su scol, el a gradua y drenta den ‘leerling raad’ y ta bayendo bon den deporte.

Pa esunnan cu ta interesa den e tema por registra den nan pagina di Facebook of por yama na 584-1211.