Impact Camp ta un seminario pa hoben unda ta promove desaroyo personal den un manera interactivo y dibertido, cu lo tuma luga di dia 9 te 11 di augustus na Hotel Marriott.
Ta un di e shete programa cu e plataforma Aruba Youth Impact ta ofrece pa hobennan. Bon Dia Aruba a tene un entrevista cu Keyla Rojas y Ashna Thijsen, kendenan ta Youth coordinador di Heart-Centered Leadership Foundation, y nan a splica cu e seminario aki lo ta di tres dia, unda tin e meta ta pa laga e hobennan traha riba nan desaroyo personal.
Rojas a comenta cu den seminario, e muchanan lo bay scucha y pone den practica tur loke nan lo siña. Cada dia tin un tema distinto cu nan lo desaroya, como por ehempel, e prome dia ta di liderazgo personal, di dos ta comunicacion y cooperacion, y dia tres nan lo dedica pa ‘conecta cu bo mes y conecta cu otronan’.
Rojas a sigura cu e proposito final ta cu e hobennan lo por sali di nan ‘comfort zone’. Saliendo for di eynan, nan lo por ripara cu nan por haci cos, pa motibo cu algun di nan por tin miedo of nan ta pensa cu lo por faya den algo. For di eynan nan por siña comunicacion, con por papia cu nan mayornan, of con nan por papia cu amistadnan. “E hobennan mester sali for di zona di comfort pa logra nan metanan academico of otro meta personal cu nan por tin”, Rojas a señala.
E seminario ta dirigi pa hobennan entre 15 aña te cu 21 aña. Esaki ta un Ace Program cu nan a haci for di varios aña pasa, y cu ta para pa Achievement and Commitment to Excellence. E oradonan lo bin for di e programa di Educare Foundation di Los Angeles, Merca y cu hunto cu e facilitado di training di Aruba Youth Impact lo ofrece e seminario.
Awendia hobennan ta pasa den algo y nan ta pensa cu nan no lo por papia cu ni un hende pa motibo cu su so ta pasando aden y p’esey e seminario aki ta dirigi pa nan por supera nan problemanan, y haya sosten di otro hobennan cu tambe ta den seminario hunto cu personanan profesional den e tema.
Rojas a splica cu un programa asina ta empodera e hobennan di berdad, nan ta sali for di eynan determina. For di su experiencia Rojas a comenta cu mayornan a aprecia algun cambionan den nan yiunan, cu ta motiva nan.
Di su parti, Thijsen a bisa cu Aruba tin problemanan social entre famianan na nan cas, pero e idea ta cu e hobennan tin e oportunidad di sali for di e problema ey, mediante locual nan ta siña den e seminario.
Tambe nan a duna di conoce cu nan ta lansando e plataforma di Aruba Youth Impact oficialmente. El a informa cu nan ta trahando cu varios organisacionnan di hoben, pa motibo cu ora e plataforma ta cla, ta bay tin e organisacionnan di hobennan ey bou e plataforma pa traha hunto tocante interesnan di hoben, pa su participacion, compromiso y servicio.
E hobennan of mayornan cu interes di participa lo por inscribi via e pagina di Facebook di Aruba Youth Impact Heart Centered Leadership Foundation.
