Den e siman di 11-14 di april 2022 a tuma lugar un serie di bishitanan di trabao den continuacion cu e inversionnan haci den reenforsa nos fronteranan por medio di e bestedingsplan vreemdelingenketen.
E bestedigingsplan vreemdelingenketen ta data di 2019 y ta incumbri un serie di proyectonan y sosten multidepartamental cu e proposito pa reenforsa e estado di derecho y fortifica nos fronteranan.
Segun un comunicado di presa, e biaha aki a toca un bishita di trabao di un delegacion di Hulanda consistiendo di representantenan di Immigratie en Naturalisatie Dienst (IND) y Koninklijke Marechausee (Kmar). E bishita aki ta bin como un follow up den cuadro di e ehecucion di e asina yama Schiphol-model na Aruba pa loke ta e procesamento di peticionnan di asilo na Aruba, teniendo na cuenta alabes e interes grandi cu e pais tin pa por tin un migracion y un control di frontera di calidad. Como delegadonan di Aruba tabata presente representantenan di e cadena di stranheria esta Inmigracion Aruba, Dimas y GNC.
Den e mesun siman tambe a tuma lugar un follow up riba loke ta e programa di hostmanship. E sesion aki a wordo guia dor di un representante di Directie Terugkeer en Vertrek ( DT&V). Hostmanship ta un programa cu renombre mundial pa cual Aruba a scoge pa asocia su mes y ta momentaneamente bezig cu un trayectorio di certificacion di algun trainers cu ta reparti bao di diferente departamento di gobierno, esta GNC, DIMAS, Inmigracion Aruba, Cuerpo Policial, KIA y CEA. E proposito di hostmanship ta pa crea un cultura di servicio y amabilidad den tur aspecto cu por atende cu hende, ni maske kico nan situacion ta. E trainers nan local lo tin e gran tarea di train otro empleadonan den gobierno den e principio importante aki.
Den e mesun rosea a probecha e presencia di e representante di DT&V na Aruba pa toca temanan comun cu ta existi entre GNC y DT&V y asina sigui elabora riba e relacion di trabao ya caba existente entre e dos departamentonan esencial aki den reino Hulandes. Por wak bek riba reunionnan di trabao hopi fructifero.
