E maneho rapido pa responde na e crisis di COVID-19 a contene e daño economico y humano grandi na Aruba. Asina IMF ta bisa den su analisis di Aruba pa 2021. IMF a conclui su analisis dia 16 di April y a publica esaki recientemente.
Mientras cu IMF ta reconoce e daño grandi cu e pandemia di COVID-19 a haci na economia y e situacion financiero di Aruba, e analisis ta mustra e reto adicional cu tin pa surpasa e crisis. E Fondo Monetario Internacional a ilustra e pasonan necesario cu Aruba y institucionnan manera Banco Central di Aruba a tuma pa mitiga e impacto di e sla economico y financiero pa motibo di e pandemia y cu maneho ta critico pa contene e efectonan di e pandemia, particularmente mirando e proyeccion pa un recuperacion chikito pa e aña aki.
IMF ta urgi Gobierno di Aruba pa prepara plannan di contingencia si e condicionnan actual ta persisti, incluso e posibilidad pa extende sosten financiero riba mercado local te cu 2022.
Pero na mesun momento IMF ta urgi Gobierno pa pone prioridad na baha gasto y hisa entrada pa asina mantene e risiconan di sostenibilidad di debe. Den e sentido aki, mester amplia e base di impuesto pa medio di e Value Added Tax, VAT pa asina por reparti e peso mas husto rond di e pais. “Mester acelera e introduccion di VAT pa absorba e caida den entrada pa medio di belasting directo, mientras cu alabes ta proteha esnan vulnerabel,” IMF a bisa.
Bon Dia Aruba lo amplia riba e analisis mas den un forma mas extenso den su proximo edicion.
