Pa esnan cu a lesa e rapport completo reciente di IMF, lo ta na altura di e punto di vista di e institucion internacional pa loke ta politica general economico/financiero di nos pais. Pero si nos tuma nos tempo pa revisa e paginanan mas patras den e informe completo, nos ta bin topa cu cifra y proyeccionnan, di cual nos por supone cu nan ta sea di gobierno di Aruba, sea di dato suministra pa Aruba y elabora pa IMF.
En todo caso nos a bin topa entre otro cu algun proyeccion di IMF encuanto e desaroyo di entrada y gasto di gobierno di Aruba den e proximo añanan, te na 2026. Mester añadi cu IMF no a duna proyeccion di desaroyo economico general (den GDP nominal y real) mas leu cu 2022, riba cual nos a comenta den nos edicion di 2 di april 2021. Di banda di gobierno si a haci esaki den e Memoria Explicativo di e presupuesto 2021, cu ta duna un proyeccion te cu 2025.
Den e siguiente tabel nos a reuni e cifranan di GDP nominal, manera gobierno di Aruba y IMF a duna nan den su proyeccion di presupuesto multi-anual, mientras a combina esakinan cu e cifranan cu IMF a duna den su rapport completo, riba pagina 30.
For di e cifranan aki por saca algun conclusion interesante. Por ehemplo, cu a base di e crecemento grandi cu gobierno di Aruba ta anticipa pa aña 2022 y 2023, gastonan di personal ta cuminza subi atrobe y na 2022 ta yega caba na e nivel ‘pre-Covid’, pa despues sigui crece pa na 2026 yega na 150 miyon florin pa aña mas na gasto di personal di gobierno so caba. Tambe e Afl. 740 miyon poni pa 2025 ta surpasa e nivel di gasto cu Raad van Advies a calcula den su conseho riba e prespuesto original 2020 (pre-Covid) na Afl. 733 miyon. E suma aki ta pa total di gasto di personal di gobierno mes, plus sectornan subsidia. Tuma nota cu e suma cu gobierno ta maneha den su reportahe y presupuestonan, cu ta actualmente mara na e maximo di Afl. 476 miyon, segun acuerdo cu Hulanda, ta encera solamente e gastonan di slario y compromiso di empleador (gobierno) pa e ambtenaarnan, pero no ta inclui Rekenkamer, Staten, ni Raad van Advies y DOW.
Relacion GDP/gasto di personal
Segun e norma internacional pa gasto di personal total, cu ta ser considera razonable, cu ta 10% di e GDP nominal, nos por mira den e tabel aki cu e cifranan presenta, y relaciona cu e GDP corespondiente, cu pre-Covid e porcentahe no tabata baha bao di 10%. Den e añanan aki, tanten cu no surpasa e crisis ta logico cu e porcentahe di GDP ta keda halto (2020, 2021), pa despues baha gradualmente, pero segun e proyeccion aki di IMF lo bay keda bastante aleha di e norma aki. Na su debido tempo nos lo haya sa pakico ta anticipa e crecemento fuerte aki den gasto di personal, si semper ta bisa cu ta esaki ta un di e aspectonan mas problematico pa gobierno.
