Den su recien publicacion “Perspectiva Economico Global”, e siman aki Fondo Monetario internacional (IMF) a duna su ultimo adaptacionnan pa loke ta e perspectiva di crecemento economico mundial. Pa loke ta America Latina y region di Caribe e institucion mundial ta mira un retroceso mas fuerte ainda, compara cu su evaluacion di april di e aña aki.
Como promedio, IMF ta mira un retroceso di 0,6%, un poco mas abao cu e 0,4% di april ultimo. Dentro di e diferente paisnan tin divergencia fuerte compara cu e promedio aki.
Entre e paisnan na banda negativo di e linea, ta aparece paisnan manera Brasil, Mexico y Venezuela. E caso mas grave sin duda ta Venezuela, cu awor segun IMF ta moviendo den direccion di un caida economico di 10% di Producto Interno Bruto (PIB,GDP). Ademas un inflacion di casi 500% y un desempleo di cerca di 20%. Pa 2017 ta pronostica un caida continua di -4,5%, en bista di cu e caida den prijs di petroleo a empeora e desekilibrio macro-economico y presion riba balansa di pago.
Ecuador ta continua confrontando un perspectiva di desafio, mirando e balor reduci di su exportacion di petroleo y si economia dolarisa. Cu un recuperacion parcial di prijs mundial di petroleo y un perspectiva mas faborabel pa loke ta financiamento externo, su crecemento ta calcula awor na -2,3% y -2,7%, pa 2016 y 2017, respectivamente.
E economia mayor di America Latino, Brasil, ta confrontando problema tambe e aña aki, un reduccion di -3,3% di su PIB pa 2016, pero ta señala miho perspectiva pa 2017, considerando cu falta di confiansa politico y economico a alcansa su punto mas abao, y ta calcula na un crecemento di 0,5%, anticipando cu e turbulencia social y politico lo a mengua pa e tempo ey.
Tambe e efectonan negativo di e shocknan economico anterior lo a mengua. E proyeccion nobo aki pa 2016 y 2017 ta 0,5% mas halto cu loke a calcula anteriormente na april di e aña aki.
Argentina a inicia un transicion importante y hopi necesario den direccion di un cuadro di politica economico mas consistente y sostenibel, cu a resulta mas costoso di loke a premira na 2016, cu crecemento proyecta na –1,8% (compara cu –1% proyecta na april). Crecemento ta mehora na 2017 te 2,7% apoya pa inflacion mas modera y medida di apoyo monetario y fiscal.
Na Colombia,crecemento ta pronostica pa baha na 2,2% na 2016 (3,1% na 2015), reflehando politica macro-economico mas estricto. Na Chile e descenso den prijs di materia prima y particularmente di koper a ocasiona un reduccion den crecemento economico te na 1,7% na 2016 (2,3% na 2015). Na ambos pais, crecemento economico na 2017 ta pronostica pa mehora y gradualmente sigui mehora segun nan potencial.
Excepcion grandi: Peru
Como excepcion grandi ta aparece Peru, cu ta programa pa crece mas rapido cu loke a pronostica anteriormente, te 3,7% na 2016 y 4,1% na 2017. Esaki a base di actividad expansivo den sector minero y inversion publico fuerte.
Crecemento na Mexico ta proyecta pa te 2,1% debi na exportacion mas debil den prome mita di aña. Ta anticipa cu esaki lo mehora levemente na 2017 te 2,3% di PIB y te 2,9 despues riba termino medio, segun e reformanan structural haya forma.
Pa region di Caribe, IMF ta duna e siguiente resumen den su tabelnan, mientras cu den e comentario general no ta dedica atencion specifico na e region: pa 2016 crecemento pa Caribe ta 3,4% pa 2016 y 3,6% pa 2017 (2015: 3,9%). E islanan cu ta conforma e unidad monetario di Caribe Oriental tin un pronostico mas modera: 2,2% pa 2016, y 2,6% pa 2017. E cifranan aki no ta contempla e teritorionan Hulandes den Caribe). For di e cifranan por deduci cu e perspectivanan en general pa e region ta un poco mas positivo compara cu e cifranan pa henter continente.
