Den su Staff Report riba Consulta Articulo IV pa Aruba, IMF a atende cu restriccionnan riba crecemento di banda di suministro. Igualmente ta recomenda reforma den mercado laboral, y reformanan den gobernacion pa reduci y preveni corupcion.

Segun IMF, autoridadnan di Aruba a desaroya strategianan comprensivo pa aumenta crecemento. E “Master Plan,” un marco comproensivo di politica strategico cu autoridadnan a desaroya na 2020 pa sostene recuperacion economico despues di pandemia y pa mehora crecemento a largo plaso, mester cuminsa keda implementa pronto y inclui legislacion di reforma riba marcado laboral, eliminacion di red-tape, refuerso di capacidad legislativo, reforma fiscal, y ampliamento di e-government.

E Plan Nacional di Accion 2023-25 anuncia recientemente pa transicion di Aruba na un modelo economico sostenible y inclusivo a identifica tecnologia ‘berde’, agricultura y economia di conocemento como e sectornan prometedor den cual Aruba mester diversifica. Tin awo un necesidad pa defini mas leu reformanan specifico pa logra e metanan di e strategianan aki y establece termino di tempo pa evalua progreso.

Un enfoke particular mester ta riba redobla esfuersonan pa aumenta e balor agrega di turismo.
Mirando e alcance limita pa diversificacion economico, turismo ta bay keda e motor principal di crecemento den proximo añanan. Pa e motibo aki ta bay ta importante pa evalua criticamente e rol di turismo den economia y maximisa e uso di infrastructura existente y conocemento (‘know-how’) pa transicion na un mix di turismo cu tin un valor domestico agrega mas halto y ta mas sostenible ambientalmente. Stop e sobre-construccion y e promove formanan nobo di turismo (manera turismo medico) por ta componentenan prometedor den un strategia mas amplio pa maximisa e impacto domestico di actividadnan turistico.

Pa reforsa crecemento potencial, reformanan di banda di suministro ta necesario.

Prioridadnan clave ta inclui:

*Aumento den facilidad di haci negoshi. Facilitando proceduranan di negoshi a traves di iniciativa di e-government y identificando areanan critico pa reduci e peso di procesonan di gobierno lo ta util. E “Business Policy Guidelines” introduci recientemente, y e esfuersonan pa mehora transicion na economia digital ta stapnan den e direccion corecto. Mester mehora e infrastructura pa pagonan digital – construyendo riba e sistema I-Pago di banco central – cu lo yuda preserva e logronan di pandemia den uso di banco electronico.

*Mehora competencia. Autoridadnan tin intencion di lansa e Aruba Fair Trade Authority na september pa examina e casonan potencial di comportamento anti-competencia. Mester sigura suficiente capacidad y recurso pa sigura cu e entidad aki ta capaz di combati comportamento anti-corupcion y protege consumidornan efectivamente.

*Emprende reforma den mercado laboral. Mester modernisa leynan laboral pa reduci e costo di contrata trahadornan nobo. Esaki mester bay combina cu un sistema nobo pa seguro di desempleo pa reduci riesgonan indiosincratico carga pa trahadornan y provee un safety net pa esnan cu ta perde nan trabao. Tambe tin espacio pa emprende politicanan pa curasha participacion femenino den mercado laboral.

*Mehora capital humano door di aumenta inversion den training y educacion (incluyendo den Ciencia, Tecnologia, Ingenieria y Matematica, STEM) y permitiendo pa fluho di labor di migrantenan cualifica (skilled labor). Mester haci esaki den colaboracion cu dunadonan di trabao local, pa identifica e habilidadnan necesario y facilita e match entre trahador y dunado di trabao.

*Mehoracion di gobernacion tambe ta bay yuda reforsa e ambiente di negoshi. Un encuesta recien di CBA ta continua indicando un percepcion amplio di corupcion na Aruba. Pa adresa problemanan di gobernacion, ta curasha autoridadnan pa trece nan marco local den linea cu e provisionnan di Convencion di Nacionnan Uni contra Corupcion. Esaki lo involucra construi capacidad di Bureau di Integridad y establecemento di codigonan di conducta pa ambtenaarnan y e legislacion pa whistleblowernan. Sistemanan robusto di declaracion di activo di ambtenaarnan (y sirbidornan publico) lo yuda den e deteccion, investigacion y enhuiciamento di corupcion. Colecta y publica informacion completo riba doñonan beneficiario di companianan cu ta aplica pa contractnan di gobierno tambe lo ta beneficioso. Manera discuti, mehoracion den intercambio di informacion di impuesto y mehoracion den e marco AML/CFT lo yuda oficialnan persigui y confisca e productonan di evasion di impuesto y corupcion.

Tambe IMF ta nota cu cambio climatico ta presenta un reto di adaptacion a largo plaso. Aruba ta un isla plat, y un cantidad substancial di su casnan, infrastructura principal y activonan turistico ta ubica cerca di nivel di lama. Economia ta bay ta afecta grandemente pa un aumento hasta modera den nivel di lama.
Un plan di accion concreto – bao auspicio di Conseho Nacional di Resiliencia Climatico – ta necesario pa duna prioridad na inversion den infrastructura cu ta mehora e resiliencia fisico di areanan cu ta abao. E plan aki mester identifica fuentenan di financiamento pa e proyectonan aki y delinea con nan ta fit dentro di e marco fiscal mas amplio a termino medio.

Un evaluacion continuo riba perfil di riesgo, e gasto planea pa necesidadnan di adaptacion pa cambio climatico, y e desaroyo di un strategia nacional di resiliencia pa clima ta stapnan den e direccion corecto.

Segun IMF, autoridadnan local tabata di acuerdo cu e prioridadnan di reforma structural, pero a resalta algun reto pa cu implementacion. Nan a subraya nan esfuersonan continuo pa reduci e gasto di haci negoshi door di digitalisa e proceso di licencia comercial, mientras a reconoce cu mester expande esaki mas ainda.

Autoridadnan a resalta nan agenda di reforma di alcance amplio pa mehora flexibilidad den mercado laboral y introduci un programa di seguro di desempleo, pero a enfatisa cu mester implementa esaki den un manera cu no ta haci daño na harmonia social.

Nan tabata di acuerdo cu e necesidad pa colecta mas data y haci mas analisis riba gap den genero. Nan a haci un alusion na nan esfuersonan andando cu stakeholdernan, pero a menciona restriccion den recurso y disponibilidad di data.

Autoridadnan local a reitera nan compromiso pa reforsa gobernacion y a declara cu ta preparando e legislacion pa e poder investigativo di Bureau di Integridad. Nan tambe a indica cu a prepara un Codigo di Conducta pa minister, mientras uno pa sirbidornan publico ta den progreso.

Igualmente, autoridadnan a reafirma nan compromiso fuerte pa adresa riesgonan di cambio climatico y mehora e proporcion di energia renobable pa cumpli cu nan meta di reduccion di emisionnan di gas di invernadero cu al menos 45 porciento pa 2030.