Den edicion anterior di Bon Dia Aruba, a publica un introduccion na e Staff Report pa Consulta Articulo IV 2023 di IMF. Esaki a keda publica siman pasa, y e rapport tin fecha di comienso di juli. Den e edicion aki, nos ta resumi e contexto di e rapport aki, esta e desaroyonan relevante cu a tene den consideracion pa traha e rapport, segun e personal di IMF.

Economia di Aruba a recupera na e nivel pre-pandemia di GDP real pa 2022, sosteni pa un recuperacion robusto den turismo. E posicion fiscal ta bin mehorando, pero e ratio debe-pa-GDP ta keda riba e nivel pre-pandemia. Sector bancario ta bon capitalisa, likido y rendable. Restaura balans macroeconomico y reforsa crecemento a termino medio ta e tareanan politico principal cu autoridadnan ta enfrenta.

Perspectiva y riesgo
 Ta spera cu crecemento ta bay modera na 2.3 porciento na 2023 y inflacion ta proyecta pa cay na 3.2 porciento. Un reduccion global mas pisa di loke a spera, specialmente na Merca, y un ahuste fiscal insuficiente ta e riesgonan clave cu economia ta enfrenta.

Recomendacionnan di politica

Politica fiscal: Mester tene debe publico riba un caminda firme di reduccion a traves di un marco fiscal bon articula a termino medio y medidanan fiscal concreto. E aumento di inversion publico planea pa autoridadnan mester ta financia a traves di aumento di entrada y spaar di gasto, y sosteni pa un marco robusto pa maneho di inversion publico.

Maneho di likides: Mester reduci rekisitonan di reserva di banco den tempo pa libera likides y sostene un aumento di intermediacion financiero.

Politica financiero: Banco Central mester reforsa supervision financiero incluyendo a traves di e desaroyo di hermentnan macroprudencial pa mitiga riesgo pa stabilidad financiero.

Politica structural: E politicanan mester ta enfoca riba aumenta e balor agrega di turismo. Mehora gobernacion y avansa esfuersonan pa adaptacion na cambio climatico tambe ta bay ta critico.

Economia di Aruba, dependiente riba turismo, a recupera despues di pandemia
 Turismo – e principal motor pa crecemento – a keda para diripiente na 2020 mientras medidanan di contencion y ceramento temporal di frontera a bin na vigor pa contene transmision di e virus. E GDP real a contrae pa un porcentahe sin precedente (24%) na 2020, y e balans di tanto cuenta coriente y fiscal a deteriora. Un lansamento rapido di vacuna, sosteni pa Hulanda, y accionnan di politica decisivo a yuda Aruba habri back pa turista prome cu su bisiñanan den Caribe. Pa segundo kwartaal di 2022, yegada di turista a aumenta riba nivelnan pre-pandemia.

Eleccion 2021 a mira regreso di prome minister incumbente Evelyn Wever-Croes na poder
 Eleccion general na 2021 a resulta den nuebe asiento pa e partido incumbente Movimiento Electoral di Pueblo (MEP) y siete asiento pa oposicion, Arubaanse Volks Partij (AVP). E cinco asiento restante a bay na tres partido chikito. Prome minister a forma un coalicion cu Raiz, cu a dun’e mayoria den e 21 asiento di Parlamento. E siguiente eleccion general ta na 2025.

Restauracion di balans macroeconomico y aumento di crecemento a termino medio ta e tareanan principal di politica di autoridadnan
 E recuperacion economico andando ta duna un oportunidad pa implementa reformanan fiscal cu ta pone finanzas publico riba un caminda mas sostenible. Accionnan decisivo tambe ta necesario pa reforsa competitividad como tambe inversion den adaptacion na cambio climatico.

Gobierno a haci algun progreso den implementacion di conseho di politica di IMF

Recomendacionnan previo a resalta e importancia di consolidacion fiscal y avance di un agenda di reforma structural cu ta inclui reforma di mercado laboral, mehoracion di ambiente di negoshi, y miho gobernacion. Autoridadnan a introduci varios medida di impuesto na comienso di 2023 pa aumenta entrada mientras a reduci e peso di impuesto riba inkomstenbelasting. Medidanan pa maneho di fluho di capital y restriccionnan di intercambio imponi pa motibo di crisis di Covid-19 a keda elimina na september 2021, segun conseho di e staff.

Crecemento economico a recupera fuertemente mientras e pandemia caba
 GDP real a crece cu 27.6 porciento na 2021, mientras a administra vacuna, turistanan a bolbe, y por a sigui sinti e efectonan di stimulacion di medidanan financiero.

A retira e medidanan relaciona cu pandemia pa fin di 2021, y crecemento a reduci na 7.3 porciento na 2022. E output gap a bira positivo na 2022, y e tasa di desempleo a reduci na 6.6 porciento pa juni 2022 (y ta parce di a continua reduciendo den e lunanan despues). Tabatin revisionnan substancial na e GDP 2018-19, cual ainda ta suheto na incertidumbre y ta mustra riba un necesidad di desaroyo di capacidad (Box 1).

Prijs halto global pa energia y cuminda a agrega na inflacion na 2022

Despues di peak na 7.7 porciento na augustus di 2022, inflacion principal a cay na 4.9 porciento na april di 2023. A pesar di control di prijs pa productonan basico, prijs di cuminda ta keda halto (un aumento di 9.4 porciento compara cu e prijs di aña pasa.)

Recuperacion economico y eliminacion di medida relaciona cu pandemia a reduci e deficit fiscal di 16.2 porciento di GDP na 2020, na 0.5 porciento di GDP na 2022.
 E recuperacion di turismo a agrega casi dos porciento di GDP na entrada di impuesto y e fin di e medidanan relaciona cu pandemia a salba 7 porciento di GDP den gasto. Debe central di gobierno a cay for di 112.3 porciento di GDP na 2020, na 90.7 porciento di GDP pa fin di 2022. Rating di debe stranhero di Aruba a mehora di BB pa BB+, segun Fitch na maart 2023, pa motibo di e crecemento fuerte post-pandemia y ahuste fiscal.

Box 1: Revisionnan reciente di Cuenta Nacional
 Anteriormente e aña aki, autoridadnan Arubano a revisa e GDP nominal cu 2.3 y 0.7 porciento pa 2018 y 2019, respectivamente. Banco Central di Aruba a haci calculacionnan no-oficial di deflators di GDP pa ambos aña, cu a resulta den un revision den aumento significante den e cambio di deflator di GDP (di casi 1.2 punto porcentual na 2018.) Como resultado, a revisa e output real den caida cu 7.1 y 12.6 porciento pa 2018 y 2019, respectivamente.
Probablemente ta bay revisa mas e data di GDP aki den proximo aña. E GDP nominal di 2019 ainda ta preliminar y ta suheto na mas revision proximo aña. E revisionnan tambe ta bay duna impulso na revisionnan den deflators di GDP. Desaroyo di capacidad pa finalisa y publica deflators oficial di GDP ta na caminda a traves di CARTAC (Caribbean Regional Technical Assitance Centre.)

Den nos siguiente edicion, Bon Dia Aruba lo presenta mas detaye di e rapport di IMF.