ORANJESTAD – Awe Minister di Finansa, Asuntonan Economico y Cultura a cuminsa cu reunionnan na IMF Spring Meetings 2019 na Washington. Minister Ruiz-Maduro a atende e prome forum, caminda a atende riba ‘Capacity Building,’ den cual ta indica con Paisnan ta tuma paso pa reenforsa nan institutonan.
Diferente pais ta brinda informacion kico nan a haci y ta haciendo riba e tereno aki y con IMF por yuda den esaki.
Segun e mandatario, na Aruba Gobierno tambe ta trahando riba esaki. Un bon ehempel ta e inversion cu a haci den e Departamento di Estadistica CBS pa asina por produci e Cuentanan Nacional pa Aruba 2013-2017 cu ta brinda informacion pa por tuma decicion na bienestar di nos pais. Cu e informacion aki, Departamento Economico por actualisa nan modelo macro economico MARUBA y asina por midi e impacto di cada decision riba nos economia.
E informacion aki ta importante tambe pa Banco Central cu por haci un miho pronostico di e crecemento economico di nosp. Tambe Ruiz-Maduro a reuni cu World Bank pa e posibel sosten tecnico, pa asina nos pais por traha riba e creacion y ampliacion di capacidad (capacity building) pa nos Aruba. Durante e siman lo sigui duna mas informacion y cu relato mas amplio di e reunionnan cu Ruiz-Maduro ta atendiendo.
Na e Spring Meeting aki ta participa mas cu 2800 delegado di paisnan cu ta miembro. Entre otro ehecutivo di banco, minister di finansa y desaroyo, parlamentario y ehecutivo di sector priva, academico y periodista pa discuti problemanan na interes mundial, perspectivanan economico mundial, eradicacion di pobresa, desaroyo economico y e efectividad di yudansa. Reina Maxima di Hulanda ta un di e oradornan pa e evento aki.
E mandatario lo participa na varios seminario, reunion informativo regional y hopi otro evento durante cual lo analisa y discuti varios temanan riba nivel di economia mundial, desaroyo internacional y sistema financiero mundial.
Ta importante pa Aruba reestablece e confiansa den e mundo financiero y pa esaki mester keda den contacto cu instancianan cu ta evalua nos sistema financiero y economico, manera IMF, Standard & Poor y Fitch. Cu e meta aki, Ruiz-Maduro ta mantene e contacto y haci e biahenan aki di trabou na bienestar di Pais Aruba.
