Den nos edicionnan recien, Bon Dia Aruba ta bin publicando e detayenan di e Staff Report pa Consulta Articulo IV 2023 di IMF. E rapport tin fecha di comienso di juli. Den e capitulo aki, e rapport di IMF ta enfoca riba gasto y debe publico, y ta adverti riba e riesgonan cu por haci e posicion di debe di Aruba insostenible.

Segun IMF, e recuperacion economico tumando lugar ta duna un oportunidad pa adresa e desbalansa macroeconomico cu a keda despues di Covid-19 y ta profundisa esfuersonan pa mehora competitividad y crecemento. Reformanan fiscal concreto, hancra den un marco fiscal coherente a termino medio, lo ta necesario pa tene debe publico riba un trayectorio firme di reduccion. E plan di autoridadnan pa mantene un surplus fiscal mientras ta aumenta inversion publico ta bon bini, pero ta bay rekeri medidanan di entrada y reduccion di gasto, como tambe un marco robusto di maneho di inversion publico. Rekisitonan di reserva mester ser reduci pa aumenta intermediacion bancario. Supervision fiscal mester di wordo reforsa, incluyendo door di desaroya hermentnan macroprudencial. Mester acelera reformanan pa adresa limitenan di banda di suministro pa crecemento. Tambe tin un necesidad pa mehora gobernacion y avansa adaptacion pa cambio climatico.

E plan pa reforsa politica fiscal na 2023 ta apropia, segun IMF, considerando e forsa di e recuperacion. Autoridadnan tin plan pa tene gasto nominal actual na e nivel di aña pasa mientras ta reduci gasto capital.

Pa loke ta entrada, autoridadnan ta proyectando mas impuesto indirecto y entrada cu no ta di impuesto, un producto di e reformanan fiscal recien, y e BBO di 7 porciento riba importacion di individuonan.

Ta spera cu e set actual di politica ta bay resulta den un surplus di 0.8 porciento di GDP na 2023, un tiki menos di loke a spera den e documentonan di presupuesto, pa motibo di un pronostico demasiado optimista pa entrada cu no ta di impuesto.

Mester desaroya un plan di contingencia pa reduci gasto pa sigura cu por cumpli cu e meta fiscal den presupuesto hasta si colecta di entrada ta cay bao di e suma pronostica den presupuesto.

Debe publico y necesidadnan di financiamento bruto ta halto. Ta spera cu debe publico ta bay cay na 85.4 porciento di GDP na 2023 y alcansa 71 porciento di GDP pa 2028. E necesidadnan financiero bruto na 2023 ta 19.2 porciento di GDP pa motibo di e maduracion na october 2023 di e prestamonan di sosten di likides cu a ricibi for di Hulanda.

SRDSA (Sovereign Risk and Debt Sustainability Assessment) ta mustra cu riesgo pa cu sostenibilidad di debe ta halto, cu un punto di presion clave resultando for di e incertidumbre tocante e refinanciamento di e debe cu Hulanda. E asuncion base ta cu ta bay refinancia e prestamo aki a traves di un prestamo a largo plaso (20 aña) for di Hulanda na tasa di interes bao di mercado. Sinembargo, esaki ta representa un riesgo clave na e posicion fiscal y e sostenibilidad di debe – si e repago di e prestamo mester ta financia den mercado, e dinamica di debe lo empeora.

E necesidadnan bruto di financiamento grandi asocia cu e repago na Hulanda ta resalta e necesidad pa un strategia sano di maneho di debe. Un strategia asina lo duna un analisis cla di e beneficionan asocia cu diferente opcionnan di financiamento, y lo yuda posiciona un plan pa diversifica e fuentenan di financiamento fiscal. E strategia lo por ta publica hunto cu e presupuesto anual y ta compaña pa un rapport ex-post anual di e resultadonan financiero.

Segun IMF, gobierno tin meta pa un surplus fiscal di 1.2 porciento di GDP a termino medio.
E medidanan di impuesto introduci recientemente ta bay yuda mobilisa entrada y e resto di e reforma fiscal planea pa gobierno mester keda implementa rapidamente.

E plan di autoridadnan pa aumenta inversion publico riba infrastructura y adaptacion pa cambio climatico ta bay yuda construi resiliencia y aumenta competitividad. Sinembargo, e inversion aki mester ta compaña pa un marco institucional robusto pa evalua propuestanan pa e proyectonan aki, incluyendo a traves di analisis di factibilidad riguroso y evaluacion di riesgo.

Introduccion di sistemanan efectivo y transparente pa obtencion, maneho di proyecto, y evaluacion ex-post proyecto lo reduci costo y mehora calidad di inversion, segun IMF ta conclui.