Parlamentario, Richard Arends a mustra cu durante reunion cu delegacion di fraccion di AVP sosteni cu IMF, e instancia aki a trece dilanti su preocupacion cu algun expresion haci durante di campaña electoral ultimo, pa loke ta reduccion di edad di pensioen.
“No por keda sin menciona e preocupacion treci di parti di miembronan di e staf di IMF durante di e reunion aki, unda nan ta mustra riba ponencianan cu a wordo haci durante campaña electoral, y e implicacionnan di esaki riba financia publico. Politiconan cu awe ta den gobierno, a papia entre otro di reduccion di edad di pensioen te cu 60 aña y expansion di e servicionan medico. Reforma nan pa salba e fondonan di pensioen, como tambe como tambe contene e gastonan di seguro medico ta decisionnan cu a wordo tuma, no solamente cu gobierno pero hunto cu sector priva, sindicatonan, trahadonan.
E reformanan aki tabata sacrificionan cu nos tur a haci, pa por garantisa un pensioen sigura pa nos grandinan manera e.o. e aumento gradualmente di edad di pensioen te cu 65 aña. Reduccion di edad di pensioen lo nifica un deficit automatico pa e fondo di behes maneha pa SVB cu na su turno gobierno ta obliga elimina esaki aumentando asina e gastonan di gobierno. IMF a mustra tambe su preocupacion pa ideanan cu a ser presenta sigur den e partido mas grandi den e actual coalicion, pa draai e cosnan aki bek y reduci edad di pensioen di biehes pa cu 60 aña.
Den campaña wordo bisa cu pa enfrenta e retonan financiero, como tambe pa por financia e gastonan adicional aki, manera e.o. reduccion di edad di pensioen tabata consisti di tres componente, esta di baha e cantidad di minister di 9 pa 7, retira tur trahado cu tabata trata den oficina di minister, como tambe elimina tur gasto di luho. E resultado te awor ta cu e cantidad di minister a keda na 8 y e reduccion di persona loke a bin ta tumando luga den un forma hopi selectivo. Cu fin di hiba un politica constructivo y discusionnan a base di argumento ta dificil pa duna un opinion concreto riba contenido di loke gobierno ta bay haci, ya cu ainda nos no a ricibi ningun informacion riba e maneho financiero y maneho economico cu gobierno ta bay sigui.
E espacio necesario pa duna nos ‘input’ manera IMF a sugeri manera cu nan
a pidi nos pa yuda den e proceso aki no ta wordo duna”, parlamentario Arends
a declara.
