IMF despues di su bishita (virtual) na nos isla a emiti su informe preliminar di e delegacion, cu ta sali inmediatamente, pa despues bin e valoracion final di e Executive Board di e entidad.

IMF tabatin palabra di aprecio pa e manera cu, segun e entidad, gobierno di Aruba a logra maneha e crisis di Covid-19 na nos isla, inclusive mencion di e medidanan di subsidio na persona desemplea, di salario na empresa chikito y mediano, tambe sosten na fondonan di seguro social. Alavez ta mustra cierto preocupacion pa e daño economico cu e crisis a ocasiona. Esaki ta naturalmente relaciona cu e dependencia halto di turismo, y lo ta exigiendo reforma mas structural pa por garantiza sostenibilidad di debe den futuro cercano.

Aunke Aruba a pasa den varios recesion desde 2008, cu a debilita economia y situacion fiscal, pero na 2019 Aruba tabata riba e trayecto di baha debe publico, segun IMF. Sin embargo, Covid-19 a causa un paro completo di turismo y por lo tanto cu efecto tambe den otro sectornan. Segun IMF, a mira un reduccion di GDP real di 25,5%. Inflacion a bira negativo y cuenta coriente a mustra un deficit calcula na 19% di GDP.

IMF ta observa cu e apoyo fiscal tabata esencial pa salba bida y entrada, loke a conduci na menos desempleo y menos bancarota, pero vulnerabilidad fiscal a aumenta, di tal forma cu e saldo fiscal a bay di 0,3% di GDP na 2019 te na un deficit di 17% di GDP na 2020. Debe publico a crece di 72% di GDP na 2019 te na 117% na fin di 2020. Ta anticipa cu na 2021 debe publico lo yega un ‘peak’ di 130% di GDP. Gran parti di e debenan acumula ta cu Hulanda, loke por duna vista riba un renegociacion faborable di debe, hasta talvez un parti cu por bira donacion.

Panorama pa mehoracion

IMF ta mira un recuperacion modera pa 2021, a base di un aumento di GDP di 5%, apoya pa Aruba su capacidad pa test y vacuna, compara cu otro pais den region. E pandemia lo laga marca duradero riba economia, loke ta causa cu te na 2025 lo por yega na e nivel ‘pre-Covid’ di GDP real. Inflacion lo aumenta pero lo keda modera, bao di nivel di 3% a mediano plazo. Cuenta coriente lo keda fuertemente den deficit na 2021 y lo mehora gradualmente segun cu fluho turistico normaliza.

Deficit fiscal ta keda halto na 2021y lo mehora gradualmente te na un surplus na 2023, apoya pa relahamento di medida temporal mientras economia ta mehora y pa re-inicio di reforma fiscal structural. IMF ta enfatisa cu e ahustenan fiscal necesario pa restaura sostenibilidad ta grandi, tanto segun standard historico como internacional.

Riesgo den e panorama ta excepcionalmente halto, cu mescos na otro pais ta relaciona cu e desaroyo incierto di e pandemia. Riesgonan domestico ta inclui daño economico relaciona cu e pandemia, riesgo halto di implementacion di ahuste fiscal necesario, y ‘feedback’ negativo entre empresa y hogar cu ta carga demasiado debe, y gobierno na otro banda. Riesgo pa cumplimento cu debe publico tambe ta halto, pero aki mester considera si por renegocia e mayoria di debe cu Hulanda. Di banda positivo, IMF ta menciona cu un ‘rollout’ diligente di vacuna y un mehoracion den servicio turistico por yuda recuperacion y crecemento a mediano plazo.

Prioridad a corto plazo: Salba bida mientras ta balanza riesgo

Medidanan tuma relaciona cu Covid-19 tabata instrumental den contene caida di entrada y no mester kita nan tanten cu economia no ta sostene su mes. Apoya recuperacion cu riesgo pa sostenibilidad di debe creciente lo requeri apoyo financiero adicional na tasa faborable di interes, a corto plazo, hunto cu agilidad pa adapta maneho rapidamente den un ambiente sumamente incierto, un esfuerzo continuo pa sigura sostenibilidad di debe unavez e pandemia bay. IMF ta recomenda pa mantene e medidanan di apoyo fiscal na 2021; paro prematuro di esakinan por causa debilidad economico pa continua y riesgo eleva, cu por causa costo mas halto ainda pa economia. Hasta ta considera pa prepara un plan di contingencia pa extende esakinan te den 2022, si por identifica fuente adicional di financiamento

Sin embargo, tambe ta necesario pa yega na priorisacion estricto di gasto y mobilisacion di entrada pa contene riesgo di sostenibilidad di debe. Medida di apoyo mester ta dirigi na hogar y empresa den necesidad inmediato dentro di un esfuerzo general di mehora eficiencia di gasto total. Tambe ta considera cu cortamento continuo den gasto di cuido di salud por aumenta e costo humano y economico di Covid. Na su lugar, mester considera un reforma mas general y structural pa mehora sostenibilidad di e sistema di cuido mas a mediano y largo plazo.

Medida pa mehora cumplimento cu impuesto lo amplia e base di impuesto mientras ta dividi e peso di manera mas equitativo den economia. Introduccion di un ‘value-added tax’ (VAT; BTW) mester bay mas acelera pa compensa pa e perdida di entrada di e reciente reduccion di impuesto directo, mientras ta proteha esnan mas vulnerable, como tambe compensacion a base di eficiencia.

Segun cu recuperacion ta tumando forma, Aruba lo mester di un consolidacion fiscal substancial y manteni a mediano plazo, pa restaura sostenibilidad y reconstrui reservanan fiscal. Mientras cu e plan di gobierno pa consolidacion fiscal a keda tumba pa e pandemia, ta esencial pa por conta cu un plan di consolidacion cu ta “creible, ‘growth-friendly” y incluyente” a mediano plazo, cu ta consistente cu e tres fasenan di reforma fiscal pa pone debe publico riba un trayecto descendiente. E recomendacionnan ta:

  • Mehora e sistema di impuesto pa aumenta entrada mientras ta minimiza distorcion y ta proteha gruponan vulnerable, cu: i) reforzando progresividad di impuesto riba propiedad (grondbelasting); ii) considera impuesto riba prosperidad (wealth taxes); iii) usa diseño di VAT pa minimiza regresividad, por ehemplo adoptando un base amplio cu algun exencion so, pa permiti un tasa abao uniforme, y un limite inicial cu ta tene empresa chikito for di lista di impuesto; y iv) usa accijns y impuesto medio-ambiental pa promove un poblacion mas saludable y un recuperacion mas amigable pa medio ambiente.
  • Contene gasto di personal di sector publico. Mientras e recorte temporal den salarionan publico a yuda reduci presion a corto plazo riba gasto, e no ta sostenible a mediano plazo. Mester mas medida permanente pa contene e gasto di personal riba un base mas sostenible sin cu ta compromete entrega di servicio publico.
  • Reforma e ‘vangnet’ social. Segun cu economia ta recupera, move di programa di apoyo di entrada pa programa mas activo di empleo cu ta duna incentivo pa participacion laboral, mientras ta keda apoya trahador cu poco salario, lo genera beneficio fiscal mientras ta ‘boost’ participacion laboral.

Reforzando e framework di politica fiscal lo yuda guia politica fiscal a mediano plazo. Adopta un framework bon diseña pa presupuesto a mediano plazo lo fortifica planificacion fiscal y lo yuda logra disciplina fiscal multi-anual. Mehorando e strategia di maneho di debe lo por guia decisionnan financiero y mitiga riesgo di refinanciamento cu ta surgi di e acumulacion di debe cu ta madura na 2022/2023, ora e prestamonan ricibi di Hulanda ta madura bao di e actual condicionnan.

IMF ta satisfecho cu e medidanan tuma pa limita riesgo di liquidez y por lo tanto no tabatin señal di escasez di liquidez inmediato den sector bancario. Maneho monetario lo mester keda acomoda apoyo pa recuperacion economico a menos cu surgi presion riba reservanan. E nivel actual di reserva di divisa ta adecuado, pero mester aumenta a mediano plazo en vista di e regreso di entrada di turismo. Ta encurasha CBA pa kita e medida riba ‘foreign exchange’ (FX) unavez cu fluho di divisa normaliza. Mester evita restriccion di maneho macro-prudencial pa preveni efecto di feedback macro-financiero adverso cu por debilita e sistema financiero y reduci prosperidad.

Banconan ta liquido y bon di capital pero CBA mester keda vigilante pa señalnan di vulnerabilidadnan financiero cu por surgi. ‘NPL’ (Non Performing Loans) a keda conteni na 5 porciento na fin di 2020. Sin embargo, provision pa calidad di activo cu ta deteriora ta afectando ganashi y NPL por aumenta significativamente unavez e apoyo na hogar y empresa bay. Monitoreo di cerca ta esencial pa sigura intervencion tempran y pa mantene stabilidad financiero. Adopcion di e acuerdo internacional Basel II lo por mehora resiliencia di e sector financiero, segun IMF.

Finalmente, IMF ta vocifera cu reforma general y structural lo ta clave pa diversifica economia y stimula crecimento potencial. Covid-19 a trece dilanti e urgencia di bin cu esfuerzo pa diversifica pa yuda contene e volatilidad di produccion relaciona na turismo y pa cataliza crecimento. A corto plazo, bay mas den direccion di modelo di turismo di menor densidad lo por yuda pa reduci daño permamente mientras ta reduci impacto negativo riba ambiente. Reforma di mercado laboral cu ta stimula flexibilidad lo mehora participacion y productividad laboral, mehorando competitividad externo pa diversificacion di exportacion mientras ta boost potencial di crecimento. Reforzando e relacion entre educacion, training, y demanda pa habilidad y ampliando acceso na infrastructura digital lo reduci e impacto a largo plazo di Covid-19, particularmente pa trahador cu poco habilidad y mas vulnerable, yudando pa alivia inigualdad y reforzando resiliencia contra riesgo di clima lo mester continua, hunto cu reforma structural cu ta mehora ambiente pa negoshi, incluyendo esunnan relaciona cu gobernacion y framework di AML/CFT.