Gobierno di Aruba mester tuma medidanan extra pa asina realisa su ambicion riba termino intermediano pa soluciona su deficit.
E Fondo Monetario Internacional a bishita Aruba den cuadro di su evaluacion cu ta tuma luga cada dos aña riba tereno di economia y financia. Den su prome conclusion (esun definitivo y mas amplio ta bin mas laat den aña) IMF ta constata cu e medidanan cu gobierno a tuma caba pa baha su deficit no ta suficiente ainda.
Pa realisa e plan di gobierno pa yega un surplus chikito otro aña, IMF ta conseha pa nan keda riba e caminda actual pa baha e deficit cu e medidanan. Asina Aruba lo logra di biaha su debe nacional di 80 pa 70%, asina e fondo ta premira.
E medidanan extra cu gobierno mester tuma, mester genera un aumento di entrada, asina IMF tambe ta bisa. Nan ta mira oportunidad pa gobierno bin cu impuestonan indirecto pa realisa esaki. Di otro banda IMF ta urgi pa gobierno baha su gastonan. Nan ta pone enfasis riba e echo cu mita di tur gastonan ta encera e salarionan di e empleadonan publico.
AZV
Remarcabel ta cu IMF tambe ta menciona nos seguro nacional AZV. Nan ta haya cu AZV mester cuminsa opera independiente di gobierno pa loke ta trata su financia. Gobierno a introduci un impuesto pa yuda financia nos seguro nacional y asina no afecta e impuesto di gobierno directo. Sinembargo e seguro nacional ainda no a logra di para riba su mesun pianan.
Riesgonan economia
Den su rapport IMF tambe ta conclui cu nan ta haya Aruba su esfuersonan pa balansa su presupuesto positivo. Siguramente considerando cu nos pais tabata den un crisis. Pero nan ta mira cu ainda tin cierto riesgonan. Un di nan ta e mercado laboral cu nan ta mira cu no tin suficiente trahadonan den futuro como cu mayoria ta cu edad y bay cu pensioen. Asina nan ta premira cu Aruba mester di inmigrantenan pa asina e economia keda lora.
