Director di Hemisferio Occidental di Fondo Monetario Internacional (IMF), Alejandro Werner diahuebs ultimo a adverti cu e pandemia di coronavirus lo por provoca “otro decada perdi” na Latino America, pa via di su impacto economico calcula den e region.
“E region tin e spectro di otro decada perdi entre 2015 y 2025”, a alerta den un conferencia di prensa virtual Werner, e responsabel maximo di Latino America di organismo multilateral cu sede na Washington.
Economia di Latino America y Caribe lo reduci un 5,2% e aña aki pa e impacto di e crisis sanitario actual, un caida hopi profundo cu esun di economia mundial, cu lo cay 3%, segun stimacion presenta siman pasa pa IMF.
“Mientras e pandemia ta sigui plama den e region, e paisnan lo enfrenta e pio recesion economico desde cu nan a cuminsa produci estadisticonan di cuentanan nacional den añanan cincuenta”. Werner a bisa.
Den su comentarionan pa prensa, el a argumenta cu e “compleho entorno externo” y e “medidanan necesario pa contene e pandemia” a provoca un caida di actividad economico na tur Latino America.
Economia di Mexico y Ecuador e aña aki lo bay ta mas afecta di Latino America pa e crisis aki, cu lo afecta e region den cadena di suministro y demanda interno y externo, entre otro factor.
Di otro banda, Werner a bisa cu varios pais di e region no por haya e recursonan necesario pa cubri necesidadnan di financiamento externo na e momentonan aki.
