Actualmente Imeldahof ta e hogar di 31 mucha entre 6 pa 14 aña pa mucha homber y 6 pa 18 aña pa mucha muhe cu pa diferente circunstancia -entre nan abuso y negligencia- nan no por a sigui bou e cuido di nan mayornan. Nan ta muchanan cu tin su pasado fastioso, asina e directora di e internaat aki, sra. Natalia Hernandez a declara na Bon Dia Aruba.
El a señala cu ora e mucha ta drenta Imeldahof, nan ta drenta cu un problema. A base di su experiencia e ta keda bisa cu hopi biaha tur cos ta depende di e edad di e mucha. Pero tambe como guiado di grupo, e tin di haber con nan profesionalnan riba e tereno aki ta atende cu nan muchanan.
E tin cu bisa cu nan muchanan no ta esunnan cu tin un bon comportacion pa motibo cu nan no a lanta den un famia cu por a brinda tur e amor y calor cu nan mester. Pero tin excepcion caminda mayornan den nan manera a duna e muchanan e sentimentonan ey, y nan por wak esey ora e muchanan drenta e internaat aki.
“Tin biaha ta simplemente e regla y structura cu por brinda caba e trankilidad na e mucha”, segun directora di Imeldahof.
Huymento
E ta haya importante cu ultimo tempo e parti di huymento fei di internaat aki a baha. Nan tin muchanan grandi ainda cerca nan, y esun mas grandi cu nan tin ta 17 aña. Sin embargo, sra. Hernandez ta considera cu no tin huymento mas pasobra esunnan cu habitualmente tabata haci esey, no ta mas cerca nan.
Tur biaha e parti cu ta keda bin dilanti ta cu mester ta consciente cu e mucha no por biba henter nan bida cerca nan. Ta asina cu e muchanan mester keda durante un temporada na Imeldahof, y nan tin cu traha pa e mucha bay cas bek.
Igualmente e mucha tambe ta traha riba su comportacion. “Nan ta traha pa logra su meta”, el a bisa. Pero unda nan ta keda haya e gap, ta cu e situacion na cas fei unda e mucha a sali pa bay interna na Imeldahof, ta unda cu e situacion a keda mescos.
“Eynan mester tin mas e guia y e sosten na mayornan pa nan tambe por crece y traha ariba nan problema cu nan tin na cas, pa e yiu por bay bek”, segun sra. Hernandez.
Famia di criansa
Otro gap cu sra. Hernandez ta cu Imeldahof tin hopi falta di famia di criansa. No tin hopi
famia mas cu ta acerca e fundacion di Famia di Criansa pa yuda cu un mucha. E tin cu bisa cu e muchanan cu nan tin nan edad ta relativamente grandi. E situacion ta cu hopi biaha e famia di criansa ta scoge pa yuda mas tanto muchanan cu ta mas chikito.
Logicamente den e caso aki, Sra. Hernandez a laga sa cu nan ta respeta cada decision di e famia di criansa, ya cu famianan semper a yuda e muchanan di Imeldahof. Tambe nan ta kere cu lo sigui conta cu e tipo di ayudo aki fei di nos comunidad.
Pero tin otro realidad, esta cu mester yuda e famia di criansa con pa siña deal y anda cu e muchanan di Imeldahof. Den e parti aki, fundacion Famia di Criansa tambe tin curso di preparacion of start curso, cu ta sostene y guia e famia di criansa riba con nan por yuda e muchanan aki.
